भोकर मतदारसंघात काँग्रेसचे माजी मुख्यमंत्री अशोक चव्हाण हेच 'किंग' ठरले आहेत. त्यांनी भाजपच्या बापूसाहेब गोरठेकर यांचा तब्बल 97 हजार 445 मतांनी पराभव केला. चव्हाण यांना 1 लाख 37 हजार 318 तर गोरठेकर यांना 41 हजार 874 मते मिळाली. २०१४ मध्ये अमिता चव्हाण यांनी मतदारसंघाचे नेतृत्व केले होते़ त्यानंतर लोकसभा पराभवानंतर यावेळी खुद्द अशोकराव चव्हाण हे निवडणुकीच्या रिंगणात उतरले होते. तर विरोधात राष्ट्रवादीतून भाजपात आलेले बापूसाहेब गोरठेकर यांना उमेदवारी देवून भाजपने ही निवडणूक प्रतिष्ठेची केली होती.
भोकर मतदारसंघात १९७८ मध्ये चव्हाण आणि गोरठेकर आमनेसामने आले होते. फरक एवढाच की, आता त्यांच्या वारसांमध्ये लढत झाली. महाराष्ट्राला मुख्यमंत्री देणारा आणि काँग्रेस पक्षाचा बालेकिल्ला म्हणून भोकर मतदारसंघाची जुनी ओळख आहे. प्रारंभी १९६२, १९६७, १९७२, १९७८ मध्ये झालेल्या विधानसभा निवडणुकीत शंकरराव चव्हाण यांनी विजय मिळवित सतत २० वर्षे नेतृत्व केले होते. त्यानंतर सातत्याने हा मतदार संघ चव्हाण कुटुंबियांच्या पाठीशी राहिला आहे.
असे होते २०१४ चे चित्र : अमिता चव्हाण (काँग्रेस-विजयी) माधवराव किन्हाळकर (भाजप-पराभूत)