नागपूर : शाळेतील जुन्या मित्रांकडून एका तरुणावर प्राणघातक हल्ला करण्यात आला. नंदनवन पोलीस ठाण्याच्या हद्दीत ही घटना घडली.
सिद्धार्थ शिवदास रामटेके (२७, जुना बगडगंज) असे जखमी तरुणाचे नाव आहे. सिद्धार्थ रात्री सव्वा आठ वाजताच्या सुमारास सिगारेट पिण्यासाठी जुना बगडगंज येथील एका पानठेल्यासमोर उभा होता. त्यावेळी त्याचे शाळेतील मित्र अक्षय वानखेडे (२९, हिवरीनगर) व करण वाकडे (२५, जुना बगडगंज) हेदेखील तेथे आले. तिघेही आपापसात बोलत असताना अक्षयने अचानक सिद्धार्थच्या सायकलला लाथ मारली. सायकल खाली पडल्याने सिद्धार्थने त्याला विचारणा केली. यावरून दोघांमध्ये वाद सुरू झाला. काही वेळातच वाद विकोपाला गेला आणि अक्षय व करणने सिद्धार्थला शिवीगाळ करत मारहाण सुरू केली.
करणने त्याच्या खिशातील चाकू काढला व सिद्धार्थच्या डोके, कानावर वार केले. यात सिद्धार्थ रक्तबंबाळ झाला. त्यानंतर दोघेही आरोपी तेथून फरार झाले. सिद्धार्थला मेडिकल इस्पितळात दाखल करण्यात आले. त्याच्या तक्रारीवरून दोन्ही आरोपींविरोधात नंदनवन पोलीस ठाण्यात गुन्हा नोंदविण्यात आला आहे. आरोपींचा शोध सुरू आहे