नागपूर : लग्नाला अवघे सहा महिनेच झालेले असताना दसऱ्याच्या दुसऱ्या दिवशी यवतमाळ येथे पतीने आत्महत्या केली. पतीच्या निधनाने खचून गेलेल्या पत्नीनेही दिवाळी पाडव्याच्या दुसऱ्या दिवशी गळफास घेऊन जगाचा निरोप घेतला. ही घटना गिट्टीखदान पोलीस ठाण्याच्या हद्दीतील बोरगाव येथील गोकुल सोसायटी, लियो गॅलेक्सी फ्लॅट नं. २०४ मध्ये गुरुवार, २७ ऑक्टोबरला दुपारी १२:३० वाजता घडली.
मीनू विशाल देशमुख (३०) असे आत्महत्या केलेल्या महिलेचे नाव आहे. मीनूचे सहा महिन्यांपूर्वी लग्न झाले होते. मीनूचे पती विशाल देशमुख हे यवतमाळला ठेकेदार होते. दसऱ्याच्या दुसऱ्या दिवशी विशाल देशमुख यांनी यवतमाळ येथे आत्महत्या केली होती. तेंव्हापासून मीनू तणावात होत्या. त्या खासगी काम करीत होत्या. पतीच्या आत्महत्येनंतर त्या सतत विचारमग्न राहत होत्या. त्यांना या दु:खातून बाहेर काढण्यासाठी त्यांच्या नातेवाइकांनी दिवाळीला आपल्या घरी बोलावले.
नातेवाइकांकडे दिवाळी केल्यानंतर गुरुवारी सकाळी मीनू आपल्या बोरगाव येथील फ्लॅटवर परतल्या. परंतु घरी येताच त्यांनी सुसाईड नोट लिहिली. यात आपल्या आत्महत्येला कोणीही जबाबदार नसल्याचा उल्लेख करून सिलिंग फॅनला ओढणी बांधून गळफास घेत आपला प्राण सोडला. या प्रकरणी स्वप्निल रमेश गिरी (३२, समता ले आउट, अंबाझरी) यांनी दिलेल्या सूचनेवरून गिट्टीखदानचे उपनिरीक्षक राजकुमार उपाध्याय यांनी अकस्मात मृत्यूची नोंद केली आहे.