१०८६ गावकारभाऱ्यांसाठी आज मतदान

नागपूर : नागपूर जिल्ह्यातील १२७ ग्रामपंचायतींमध्ये उद्या, शुक्रवारी (दि. १५) रोजी निवडणूक होणार आहे. एकूण १३० नियोजित ग्रामपंचायतींपैकी सोनपूर (कळमेश्वर) व जटामखोरा (सावनेर) या ग्रामपंचायतींची निवडणूक बिनविरोध झाली आहे. यासोबत कुही तालुक्यातील देवळी कला ग्रामपंचायतीची निवडणूक मतदार यादीतील घोळामुळे रद्द करण्यात आली आहे. त्यामुळे १२७ ग्रामपंचायतींमध्ये उद्या सकाळी ७.३० ते सायंकाळी ५.३० वाजपेपर्यंत मतदानाची प्रक्रिया पार पडेल.

१२७ ग्रामपंचायतींच्या ४३१ पैकी ४११ वॉर्डात ही निवडणूक होत आहे. येथे ११९६ जागांपैकी १०८६ जागांसाठी मतदान होईल. यासाठी ३०१५ उमेदवार निवडणुकीच्या रिंगणात आहेत. जिल्ह्यात बहुतांश ग्रामपंचायतींमध्ये महाविकास आघाडी विरुद्ध भाजप समर्थीत पॅनल अशी लढत होत आहे.

निवडणुकीसाठी १३ तालुक्यात ४८५ मतदान केंद्रांवर १४५५ मतदान अधिकारी - कर्मचारी नियुक्त करण्यात आले आहेत. यात मतदान केंद्रनिहाय ४८५ केंद्रप्रमुख व मतदान केंद्र अधिकारी यांचा समावेश आहे. या निवडणुकीची ११ डिसेंबर २०२० रोजी अधिसूचना जारी करण्यात आली होती. १३ तालुक्यांमध्ये तहसीलदारांमार्फत निवडणुकीचा कार्यक्रम जाहीर करण्यात आला आहे. काटोल तालुक्यात ३ ग्रामपंचायतींच्या ९ वॉर्डातील २३ जागांसाठी मतदान होईल. नरखेड तालुक्यात १७ ग्रामपंचायतींच्या ५५ वॉर्डापैकी प्रत्यक्ष ५४ वॉर्डात १३३ जागांसाठी मतदान होईल. सावनेर तालुक्यात ११ ग्रामपंचायतींच्या ३८ वॉर्डातील ९६ जागांसाठी मतदान होईल. कळमेश्वर तालुक्यात ४ ग्रामपंचायतींच्या १३ वॉर्डातील ३७ जागांसाठी मतदान होईल. रामटेक तालुक्यात ९ ग्रामपंचायतींच्या ३२ वॉर्डातील ८२ जागांसाठी मतदान होईल. पारशिवनी तालुक्यात १० ग्रामपंचायतींच्या ३१ वॉर्डातील ८० जागांसाठी मतदान होईल. मौदा तालुक्यात ७ ग्रामपंचायतींच्या ३१ वॉर्डातील ५८ जागांसाठी मतदान होईल. कामठी तालुक्यातील ९ ग्रामपंचायतींच्या ३१ वॉर्डातील ८५ जागांसाठी मतदान होईल. उमरेड तालुक्यातील १४ ग्रामपंचायतींच्या ४३ वॉर्डातील ९४ जागांसाठी मतदान होणार आहे. भिवापूर तालुक्यातील ३ ग्रामपंचायतींच्या ९ वॉर्डामधील २७ जागांसाठी मतदान होईल. कुही तालुक्यातील २४ ग्रामपंचायतींच्या ७८ वॉर्डातील १८६ जागांसाठी मतदान होईल. नागपूर ग्रामीणमधील ११ ग्रामपंचायतींच्या ४७ वॉर्डातील १३२, तर हिंगणा तालुक्यातील ५ ग्रामपंचायतींच्या १७ वॉर्डातील ५९ जागांसाठी मतदान होईल.

--

मतदानासाठी आवश्यक साहित्यासह मतदान केंद्रावर पोलिंग पार्टी गुरुवारी रवाना झाली आहे. निवडणूक होत असलेल्या १२७ ग्रामपंचायतींच्या क्षेत्रात कुठेही संवेदनशील केंद्र नाही. मतदारांनी कोविड नियमांचे पालन करीत मतदानाचा हक्क बजावावा.

- डॉ. शिवनंदा लंगडापुरे

उपजिल्हाधिकारी तथा प्रभारी अधिकारी ग्रा. पं. निवडणूक

कोरोनाच्या पार्श्वभूमीवर

निवडणूक आयोगाच्या निर्देशानुसार कोरोना प्रतिबंधात्मक सुरक्षा उपायांचे पालन करून मतदान प्रक्रिया राबविली जाईल. तहसीलदार व तालुकास्तरीय आरोग्य यंत्रणेद्वारे मतदान केंद्रांवर कोरोना सुरक्षा उपाययोजना करण्यात आल्या आहेत.

पोलीस बंदोबस्त

जिल्ह्यात निवडणुका शांतपणे पार पाडव्यात, यासाठी पोलीस यंत्रणा सज्ज झाली आहे. जिल्ह्यात ४८५ मतदान केंद्रांवर १०० पोलीस अधिकारी, ६११ पोलीस कर्मचारी, २५० होम गार्ड तैनात करण्यात आले आहेत. यासोबतच एसआरपीएफच्या दोन कंपन्या, शीर्घ कृती दल आणि दंगा नियंत्रण पथक सज्ज असल्याची माहिती नागपूर ग्रामीणचे पोलीस अधीक्षक राकेश ओला यांनी दिली.

सोमवारी मतमोजणी

मतदानाची प्रक्रिया पार पडल्यानंतर तालुकास्तरावरील स्ट्राँग रुममध्ये इव्हीएम सुरक्षित ठेवण्यात येईल. सोमवारी (दि. १८) तेराही तालुक्यात नियोजित केंद्रांवर सकाळी १० वाजल्यापासून मतमोजणीला सुरुवात होईल. दुपारी ४ वाजेपर्यंत मतमोजणीची प्रक्रिया पूर्ण होण्याचा अंदाज आहे.