दोन दिवसानंतर आज लसीकरण

लोकमत न्यूज नेटवर्क

नागपूर : राज्य शासनाकडून कोविशिल्ड लसी प्राप्त झाल्यामुळे दोन दिवसानंतर आज बुधवारी १८ वर्षांवरील व ४५ वर्षांवरील वयोगटातील सर्व नागरिकांचे लसीकरण महापालिकेसह शासकीय केंद्रावर होणार आहे. या वयोगटातील नागरिकांना कोविशिल्ड लस नि:शुल्क दिली जाईल.

सर्व केंद्रावर लसीकरण सकाळी ११ ते संध्याकाळी ५ पर्यंत केल्या जाईल. यासाठी ऑनलाईन आणि ऑफलाईन अशा दोन्ही पद्धतीने नोंदणी करता येईल. सध्या महापालिका आणि अन्य शासकीय केंद्रांवर कोविशिल्ड तर तीन केंद्रांवर कोव्हॅक्सिन लस उपलब्ध आहेत.

१८ वर्षांवरील व ४५ वर्षांवरील नागरिकांसाठी कोव्हॅक्सिन पहिला व दुसरा डोस शासकीय वैद्यकीय महाविद्यालय, डॉ. बाबासाहेब आंबेडकर रुग्णालय व महाल येथील मनपाच्या स्व. प्रभाकर दटके रोगनिदान केंद्र येथे उपलब्ध आहे. ज्या नागरिकांनी कोव्हॅक्सिनचा पहिला डोस घेतला आहे, त्यांना दुसरा डोस शासकीय वैद्यकीय महाविद्यालय व स्व. प्रभाकर दटके रोगनिदान केंद्र येथे देण्याची व्यवस्था करण्यात आली आहे. यासाठी त्यांना ऑनलाईन नोंदणीचा पर्याय उपलब्ध आहे.

केंद्र शासनाच्या नवीन निर्देशानुसार ज्या नागरिकांनी कोविशिल्डचा पहिला डोस १२ आठवड्यापूर्वी घेतला आहे, त्यांना दुसरा डोस दिला जाईल. आरोग्य सेवक, फ्रंटलाईन वर्कर यांनासुद्धा दुसरा डोस दिला जाणार आहे. तसेच ड्राईव्ह इन व्हॅक्सिनेशन केंद्रावरसुद्धा १८ वर्षांवरील सर्व नागरिकांचे लसीकरण होणार असल्याची माहिती मनपा प्रशासनाने दिली.