दुचाकीची रस्ता संरक्षक भिंतीच्या खांबाला धडक

पारशिवनी: भरधाव वेगाने जाणाऱ्या दुचाकी स्वाराने रस्त्याच्या कडेला असलेल्या संरक्षक भिंतीच्या खांबाला धडक दिली. यात दोघांचा मृत्यू झाला तर एक जण जखमी झाला. ही घटना पारशिवनी सावनेर रस्त्यावरील दहेगाव मोडवर शनिवारी रात्री ९ वाजता च्या सुमारास घडली. जितेंद्र उमराव कोरडे (२३) रा.तिगाव. ता. पांढुर्णा व दिनेश भीमराव सोनवाणे (२८) रा.वाळेगाव, ता. पांढुर्णा अशी मृतांची तर प्रीतम अमरचंद धुर्वे (३०) रा. मेहलारी ता. मोहरखेड असे जखमीचे नाव आहे. हे तिघेही मध्य प्रदेशातील छिंदवाडा जिल्ह्यातील राहणारे आहे. प्रीतम हा दिनेश सोबत कामगार कंत्राटदार जितेंद्र यांच्याकडे खैरी पंजाबराव जिनिंग मिल,खापा येथे काम करायचे. ते काही कामानिमित्त मनसर येथील जिनिंग मिलमध्ये आलेले होते. शनिवारी रात्री ८ वाजताच्या सुमारास ते तिघेही दुचाकीने तिबलसीट मनसर वरून खापाकडे निघाले होते. त्यावेळी गाडी जितेंद्र कोरडे चालवित होता. गाडी वेगाने जात असता दहेगाव मोड वरील लोखंडी संरक्षक भिंतीच्या खांबाला दुचाकीने जोरात धडक दिली. त्यामुळे तिघेही रस्त्याच्या कडेला पडले. लागलीच घटनेची माहिती प्रीतमने खैरी पंजाबराव जिनिंग मिल येथील इतर सहकाऱ्यांना दिली . घटनास्थळी पारशिवनी पोलीस देखील पोहचले. पोलिसांनी तिघांना मेयो येथे उपचारासाठी दाखल केले. तपासनीअंती वैद्यकीय अधिकाऱ्यांनी दुचाकी चालक जितेंद्र याला मृत घोषित केले. दिनेश याचा रविवारी पहाटे उपचारादरम्यान मृत्यू झाला.