नागपूर : दोन आरोपींनी अगोदर एका ऑटोचालकाकडून लिफ्ट घेतली व त्यानंतर दारूसाठी पैसे न दिल्याने ऑटोचालकाला मारहाण करून लुटले. हिंगणा पोलीस ठाण्याच्या हद्दीत ही घटना घडली.
चंद्रकिशोर हिराचंद पालीवाल (३७, अमरनगर, हिंगणा मार्ग) हे ऑटोचालक आहेत. रविवारी दिवसाच्या सुमारास त्यांना ऑटोचालकच असलेला आकाश भगवान राऊत (३५, हिंगणा, धनगरपुरा) व आतिश सोनटक्के (३०, हिंगणा, धनगरपुरा) यांनी थांबविले. जवळच आकाशचा ऑटो उभा असून तिथपर्यंत सोडून देण्यास सांगितले. ते चंद्रकिशोरला विदर्भ बिल्डर्स मार्गासमोर असलेल्या नाल्याजवळ घेऊन गेले व तेथे दारू पिण्यासाठी पैसे मागितले.
चंद्रकिशोर यांनी नकार दिल्याने दोन्ही आरोपींनी शिवीगाळ करत मारहाण सुरू केली व दगडाने प्रहार केले. यात चंद्रकिशोर जखमी झाले. आरोपींनी त्यांच्या खिशातून मोबाईल व रोख तीन हजार रुपये काढून पळ काढला. चंद्रकिशोर यांनी हिंगणा पोलीस ठाण्यात तक्रार दाखल केली. त्यांना हिंगणा ग्रामीण रुग्णालयात दाखल करण्यात आले. त्यांच्या तक्रारीवरून दोन्ही आरोपींविरोधात गुन्हा दाखल करण्यात आला. पोलिसांनी दोघांचाही शोध घेत आरोपींना अटक केली आहे.