लोकमत न्यूज नेटवर्क
नागपूर - पारडी, कपिलनगर आणि हुडकेश्वर पोलीस ठाण्याच्या हद्दीत घडलेल्या वेगवेगळ्या अपघातात एका अनोळखी व्यक्तीसह तिघांचा करुण अंत झाला. वीरेंद्र विजय मारकंडे (वय २६, रा. नवीननगर), सज्जनसिंग संधू (वय ६४, रा. तक्षशिलानगर) आणि एक अंदाजे ५५ वर्षीय व्यक्तीचा मृतांमध्ये समावेश आहे. जखमीचे नाव राहुल बिसेन आहे.
ट्रेलरमुळे झाला घात
नवीननगर दिनेश किराणा दुकानाजवळ राहणारा वीरेंद्र विजय मारकंडे त्याचा मित्र राहुल लहूजी बिसेन सोबत गुरुवारी दुपारी २.३० च्या सुमारास दुचाकीने जात होता. कापसी पुलाजवळ त्याची भरधाव दुचाकी ट्रेलरवर धडकली. त्यामुळे वीरेंद्रचा जागीच मृत्यू झाला तर राहुल गंभीर जखमी झाला. राहुलच्या कुटुंबात आईवडील, भाऊ बहिण, पत्नी आणि ८ महिन्याचा मुलगा आहे. ट्रकवर क्लिनर म्हणून काम करणारा वीरेंद्र कुटुंबप्रमुख होता. वीरेंद्रच्या मृत्यूमुळे त्याच्या कुटुंबीयांवर जबर मानसिक आघात झाला आहे. अपघाताची माहिती कळताच पारडी पोलीस घटनास्थळी पोहचले. त्यांनी आरोपी ट्रेलरचालकाविरुद्ध गुन्हा दाखल केला.
वृद्ध मजुराचा गेला बळी
तक्षशिलानगरातील रहिवासी सज्जनसिंग मंगलसिंग संधू हे मिळेल ते काम करून कुटुंब चालवत होते. १७ जुलैला दुपारी ते कपिलनगरातून कामाचे पैसे आणण्यासाठी जात होते. वेगात आलेल्या ट्रकचालकाने त्यांना जोरदार धडक मारली. त्यामुळे ते गंभीर जखमी झाले. त्यांना मेडिकलमध्ये दाखल करण्यात आले. तेथे उपचार सुरू असताना डॉक्टरांनी २१ जुलैला संधू यांना मृत घोषित केले. सिंधरकाैर सज्जनसिंग संधू यांच्या तक्रारीवरून कपिलनगर पोलिसांनी आरोपी ट्रकचालक देवेंद्र रतिराम यादव (वय ३०, रा. दाैलतग्राम, उत्तर प्रदेश) याच्याविरुद्ध गुन्हा दाखल केला.
सायकलस्वाराचा बळी गेला
हुडकेश्वरमध्ये एका सायकलस्वाराचा ट्रकचालकाने बळी घेतला. मृताचे नाव स्पष्ट झाले नाही. गुरुवारी दुपारी ११.४५ वाजताच्या दरम्यान सायकलस्वार हुडकेश्वर पोलीस ठाण्याच्या हद्दीतून जात असताना निष्काळजीपणे ट्रक चालवून आरोपी ट्रकचालकाने सायकलस्वाराचा बळी घेतला. त्यानंतर आरोपी ट्रकचालक पळून गेला. माहिती मिळाल्यानंतर हुडकेश्वर पोलीस घटनास्थळी पोहचले. मृताची ओळख पटविण्याचे पोलीस प्रयत्न करीत आहेत.