नागपूर : उपराजधानीत उन्हाचे चटके जाणवू लागले असून दिवसेंदिवस पारादेखील चढायला लागला आहे. पोलिसांना गुंगारा देत चोरी करणाऱ्या चोरट्यांनादेखील बहुतेक उकाड्याचा त्रास होऊ लागला आहे. म्हणूनच की काय ओंकारनगर परिसरात अज्ञात चोरट्यांनी एका दूध कंपनीच्या ‘आऊटलेट’ला फोडले व तेथून हजारो रुपयांचे आईसक्रीम चोरून नेले.
अजनी पोलिस ठाण्याच्या हद्दीत ही घटना घडली आहे. सैन्यातून सेवानिवृत्त झालेले कमलेश उमाडे यांचे ओंकारनगर चौकात ‘मदरडेअरी‘चे आऊटलेट आहे. तीन दिवसांअगोदर त्यांनी रात्री आऊटलेट बंद केले व नेहमीप्रमाणे दुसऱ्या दिवशी आऊटलेट उघडायला गेले असता शटर तुटलेले होते. चोरट्यांनी आऊटलेटमधील रोख पैसे, चीज, ज्यूसच्या बॉटल्ससह विविध फ्लेवर्सच्या आईसक्रीमचे बॉक्स लंपास केले. चोरट्यांनी जवळपास ११ हजारांचा मुद्देमाल चोरून नेला. उमाडे यांच्या तक्रारीवरून पोलिसांनी अज्ञात चोरट्यांविरोधात गुन्हा दाखल केला आहे.