आमदारांचे मनपातील वारस कोण ? : गजभियेंचे ‘वेट अ‍ॅण्ड वॉच’ कमलेश वानखेडे नागपूर महापालिकेत नगरसेवक म्हणून दाखल झालेले भाजप नेते अनिल सोले, सुधाकर कोहळे व राष्ट्रवादी काँग्रेसचे प्रकाश गजभिये हे तीन नेते याच कार्यकाळात आमदार झाले. आमदार झाल्यानंतरही त्यांनी नगरसेवकपदाचा राजीनामा दिला नाही. उलट महापालिकेच्या सभेत सक्रिय नगरसेवकाप्रमाणे भाग घेतला. आता आमदारकीमुळे यांना महापालिकेची निवडणूक लढविता येणार नाही. मात्र, ते आपली जागा कुणाला सोपवतात याकडे राजकीय वर्तुळाचे लक्ष लागले आहे. आ. अनिल सोले व आ. सुधाकर कोहळे यांनी आपल्या कुटुंबातून कुणीही महापालिकेची निवडणूक लढणार नाही, असे जाहीर केले आहे तर आ. प्रकाश गजभिये यांनी ‘वेट अ‍ॅण्ड वॉच’ ची भूमिका घेतली आहे. आ. अनिल सोले महापालिकेच्या निवडणुकीत प्रभाग ५२ दीक्षाभूमी मधून विजयी झाले होते. त्या वेळी या प्रभागातून आणखी दोन-चार पदाधिकारी कार्यकर्तेही निवडणूक लढण्यास इच्छुक होते. मात्र, सोले यांच्यासाठी त्यांनी माघार घेतली. सोले लढले, जिंकले व पुढे महापौरही झाले.आ. सुधाकर कोहळे ६२, म्हाळगीनगर प्रभागात तर व आ. प्रकाश गजभिये हे ५४, व्हीएनआयटी या प्रभागातून महापालिकेची निवडणूक लढले होते. या दोन्ही नेत्यांच्या प्रभागातही इच्छुक कार्यकर्ते होते. मात्र, आपले नेते स्वत: रिंगणात उतरत असल्यामुळे स्थानिक कार्यकर्त्यांनी भक्कमपणे त्यांच्या पाठिशी राहणे पसंत केले. साधारणत: राजकारणात नेतेमंंडळी आपली गादी आपल्या घरच्या वारसाला सोपविताना दिसतात. कुणी पत्नीला रिंगणात उतरवितात तर कुणी मुलगा किंवा मुलीला. यापैकी कुणी सक्षम नसेल तर सख्ख्या नातेवाईकाचा प्राधान्याने विचार केला जातो. आमदार म्हणून काम केल्यानंतर खासदार झालेल्या काही दिग्गज नेते मंडळींनी आपल्या पत्नीला, मुलांना आमदारकीच्या रिंगणात उतरविल्याची उदाहरणे महाराष्ट्राच्या राजकारणात आहेत. अशात आमदारांनी महापालिकेतील आपली जागा नातेवाईकाला दिली तर वावगे काय, असेही समर्थन नेत्यांकडून केले जाते. महापालिकेची प्रभाग रचना अद्याप जाहीर व्हायची आहे. सामाजिक आरक्षणाचे चित्रही स्पष्ट व्हायचे आहे. हे सर्व झाल्यानंतरच इच्छुक उमेदवारांचे चेहरे पुढे येतील. त्यावेळी आमदारांच्या जागी कुणाला संधी मिळते हे स्पष्ट होईल.
सोले, कोहळेंच्या कुटुंबातून उमेदवार नाही
By लोकमत न्यूज नेटवर्क | Updated: August 17, 2016 02:06 IST