नागपूर : मुलाचे निधन झाल्यामुळे त्याचा जबर धक्का बसलेल्या ९० वर्षांच्या वडिलांनीही जीव सोडला. ही घटना शनिवारी सकाळी सात वाजताच्या सुमारास नरेंद्रनगर येथील श्रीनगरमध्ये घडली. वडील आणि मुलावर एकाच वेळी अंत्यसंस्कार करण्याची वेळ आल्यामुळे नातेवाइकांसह परिसरातील नागरिकांनी हळहळ व्यक्त केली.
संदीप धर्मराज कटारमल (५२, श्रीनगर, नरेंद्रनगर) यांचे शुक्रवारी सकाळी ५.३० वाजता हृदयविकाराने निधन झाले. त्यांची ट्रॅव्हल्स एजन्सी होती. संदीप यांच्या निधनामुळे कटारमल कुटुंबीयांवर शोककळा पसरली. मुलाच्या निधनामुळे संदीप यांचे वडील धर्मराज (९०) यांना जबर धक्का बसला. मुलाऐवजी आपल्यावर काळाने झडप घालायला हवी होती, अशी भावना त्यांनी व्यक्त केली. दरम्यान, शनिवारी सकाळी सात वाजता मुलाच्या विरहात धर्मराज यांची प्रकृती बिघडली. यात त्यांचा मृत्यू झाला. एकाच कुटुंबात वडील आणि मुलाचा मृत्यू झाल्यामुळे जमलेले नातेवाईक आणि परिसरातील नागरिकांनी हळहळ व्यक्त केली. शनिवारी सकाळी ११ वाजता मानेवाडा घाटावर मुलगा संदीप आणि वडील धर्मराज यांच्यावर शोकाकुल वातावरणात अंत्यसंस्कार करण्यात आले.
.............