नागपूर : बारमध्ये गोंधळ घालणाऱ्या बोगस पत्रकार फारीस कादरीच्या मित्राने मोमीनपुऱ्यात आठवड्याभराअगोदर पिस्तुलाच्या धाकावर दहशत निर्माण केली. या घटनेची माहिती मिळताच पोलीस सक्रिय झाले व संबंधित एमडी तस्कर भूमिगत झाला. या प्रकारामुळे मोमीनपुऱ्यात खळबळ माजली होती.
बारची तोडफोड आणि खंडणी प्रकरणात सदर पोलिसांनी फारीसला अटक केली आहे. त्याने पोलीस कर्मचाऱ्यालादेखील शिवीगाळ केली होती. सदर पोलिसांनी फरीसवर पोलीस कर्मचाऱ्याला शिवीगाळ आणि सरकारी कामात अडथळा आणल्याप्रकरणी गुन्हा दाखल केला आहे. दरम्यान, मोमीनपुरा येथे त्याचा साथीदार व अमली पदार्थांचा तस्कर सानू याने पिस्तुलाचा धाक दाखविला. त्याच्यावर खुनाचा प्रयत्न, तस्करी, पोलिसांवर हल्ला, खंडणीसह अनेक गुन्हे दाखल आहेत. त्याच्यावर एमपीडीएची कारवाईही करण्यात आली आहे.
फारीसलादेखील अमली पदार्थांचे व्यसन आहे. आठवडाभरापूर्वी सानूने मद्यधुंद अवस्थेत मोमीनपुरा येथील चुडीवाली गल्लीत पिस्तूल दाखवत धाक दाखविला. या घटनेमुळे लोकांमध्ये घबराट पसरली. पोलिसांना माहिती न दिल्याने हा प्रकार उघडकीस आला नाही. फारीसला अटक केल्यानंतर ही घटना उघडकीस आली. त्यानंतर सानू गायब झाला.