बुटीबाेरी (नागपूर) : चालकाचा ताबा सुटल्याने वेगात असलेली कार राेडलगत उभ्या असलेल्या कंटेनरवर मागून जाेरात आदळली. यात चालकाचा गळा चिरला गेल्याने त्याचा घटनास्थळीच मृत्यू झाला. ही घटना बुटीबाेरी (ता. नागपूर ग्रामीण) पाेलीस ठाण्याच्या हद्दीतील नागपूर-वर्धा महामार्गावरील माेहगाव शिवारातील उड्डाणपुलावर रविवारी (दि. २४) रात्री ८ वाजताच्या सुमारास घडली.
प्रशांत लक्ष्मण येसंबरे (३७, रा. अंबाझरी, नागपूर) असे मृताचे नाव आहे. प्रशांत हा बुटीबाेरी एमआयडीसी परिसरातील केईसी इंटरनॅशनल नामक कंपनीमध्ये कारचालक म्हणून नाेकरी करायचा. ताे रविवारी रात्री काम आटाेपून एमएच-४०/एआर-७४५० क्रमांकाच्या कारने बुटीबाेरीहून नागपूरला जायला निघाला हाेता. ताे माेहगाव शिवारातील उड्डाणपुलावर पाेहाेचताच त्याचा वेगात असलेल्या कारवरील ताबा सुटला आणि ती कार थेट राेडलगत उभ्या असलेल्या नादुरुस्त एनएल-०१/क्यू-९११५ क्रमांकाच्या कंटेनरवर मागून आदळली.
धडक एवढी जबर हाेती की, कारच्या छताचा पत्रा निघाला व त्या पत्र्यामुळे प्रशांतचा गळा चिरला. त्यामुळे त्याचा घटनास्थळीच मृत्यू झाला. एवढेच नव्हे तर एक दुचाकीचालक जखमी झाला. जखमी दुचाकीचालकाचे नाव कळू शकले नाही. माहिती मिळताच पाेलिसांनी घटनास्थळ गाठून मृतदेह उत्तरीय तपासणीसाठी नागपूर शहरातील मेडिकल हाॅस्पिटलमध्ये पाठविला. पाेलिसांनी जखमी दुचाकीचालकास बुटीबाेरी येथील खासगी हाॅस्पिटलमध्ये भरती केले. याप्रकरणी बुटीबाेरी पाेलिसांनी सय्यद अशपाक अली अकबर अली, रा. हनुमान नगर, डोंगरगाव, ता. नागपूर ग्रामीण यांच्या तक्रारीवरून गुन्ह्याची नाेंद केली. या घटनेचा तपास पोलीस उपनिरीक्षक जगदीश पालीवाल करीत आहेत.