नागपूर: आंध्रप्रदेशातून आलेल्या एका कारमधून ५० किलो गांजाची तस्करी करण्यात आल्याची बाब समोर आली आहे. नागपूर पोलिसांच्या गुन्हेशाखेच्या अंमली पदार्थ विरोधी पथकाने ही कारवाई केली असून उत्तरप्रदेशमधील दोन आरोपींना अटक करण्यात आली आहे.
आंध्रप्रदेशातील विशाखापट्टणम येथून एका पांढऱ्या रंगाच्या कारमधून गांजा तस्करी होणार असल्याची माहिती गुन्हेशाखेच्या पथकाला मिळाली होती. त्यानुसार रविवारी सकाळी वर्धा मार्गावरील चिंचभुवन परिसरात सापळा रचण्यात आला. सकाळच्या सुमारास एचआर २६ एएक्स ०१२७ या कारला अडविण्यात आले. पोलिसांनी कारची झडती घेतली असता त्यात तीन पोत्यांमध्ये ५० किलो ओलसर गांजा आढळला. पोलिसांनी कारचालक यशपाल नानकचंद चव्हाण (३२) व अंकित श्यामवीर सिंग (२१) दोघांनाही अटक केली.
दोघेही उत्तरप्रदेशातील गाजियाबाद जिल्ह्यातील अकबरपूरयेथील निवासी आहेत. त्यांच्या ताब्यातून गांजा, मोबाईल फोन व कार असा १७.७१ लाखांचा मुद्देमाल जप्त करण्यात आला. पोलीस निरीक्षक शुभांगी वानखेडे, विजय दायव, शैलेष डोबोले, मनोज नेवारे, विवेक अढाऊ, सूरज भानावत, नितीन येरपुडे, सहदेव चिखले, रोहीत काळे, चंद्रशेखर पाटने, राहुल पाटील यांच्या पथकाने ही कारवाई केली.