पारशिवनी : चालकाचा ताबा सुटल्याने अनियंत्रित स्काॅर्पिओ राेडलगत उलटली. त्यात चालकाचा मृत्यू झाला, तर त्याचा मित्र गंभीर जखमी झाला. ही घटना पारशिवनी पाेलीस ठाण्याच्या हद्दीतील कालभैरवपेठ शिवारात शनिवारी (दि.१०) सकाळी ५.३० वाजताच्या सुमारास घडली.
सुरेश कुवरधर्माकुर्रे (२९, रा.वेकाेलि काॅलनी, वलनी खाण, खापरखेडा, ता.सावनेर) असे मृताचे तर रामबिहारी सूरजनाथ बारी (५१, रा.वलनी खाण, खापरखेडा, ता.सावनेर) असे जखमीचे नाव आहे. दाेघेही एमएच-४६/डब्ल्यू-२७६८ क्रमांकाच्या स्काॅर्पिओने खापरखेड्याहून भागेमाहेरीकडे जात हाेते. ते या मार्गावरील कालभैरवपेठ शिवारात पाेहाेचताच, चालकाचा वाहनावरील ताबा सुटला आणि अनियंत्रित स्काॅर्पिओ राेडलगत उलटली. यात दाेघांनाही गंभीर दुखापत झाली. मात्र, सुरेशचा काही वेळात घटनास्थळीच मृत्यू झाला. माहिती मिळताच, पाेलिसांनी घटनास्थळ गाठून रामबिहारीला उपचारासाठी तर सुरेशचा मृतदेह उत्तरीय तपासणीसाठी पारशिवनी येथील ग्रामीण रुग्णालयात आणला. या प्रकरणी पारशिवनी पाेलिसांनी भादंवि २७९, ३३७, ३०४ (अ) अन्वये गुन्हा दाखल केला असून, या घटनेचा तपास पाेलीस उपनिरीक्षक पळनाटे करीत आहेत.