नागपूर : वाढलेला कामाचा ताण अन् कर्मचाऱ्यांच्या कमतरतेमुळे चक्क सेवानिवृत्त कर्मचाऱ्यांची सेवा घेण्याची वेळ राष्ट्रसंत तुकडोजी महाराज नागपूर विद्यापीठावर आलेली आहे. परंतु तंत्रज्ञानाचे ज्ञान तर सोडाच परंतु साधी ‘नोटशीट’देखील नीट लिहू न शकणाऱ्या काही सेवानिवृत्त कर्मचाऱ्यांचादेखील यात समावेश आहे. विद्यापीठाला ‘टेक्नोसॅव्ही’ करण्याचा कुलगुरू डॉ.सिद्धार्थविनायक काणे यांचा संकल्प आहे. परंतु अशा स्थितीत नव्या योजनांची अंमजबजावणी करून खऱ्या अर्थाने विकासाच्या मार्गावर विद्यापीठ कधी जाणार व ‘टेक्नोसॅव्ही’ रुप कसे येणार, असा प्रश्न उपस्थित करण्यात येत आहे.नागपूर विद्यापीठात अद्याप शिक्षकेतर अधिकारी व कर्मचाऱ्यांची पदभरती न झाल्याने विविध विभागांवर प्रचंड ताण आलेला आहे. यामुळे परीक्षा विभागाच्या कामावर सर्वात जास्त परिणाम होत आहे. पदभरती करण्याचे सोडून विद्यापीठाने यावर वेगळाच मार्ग शोधून काढला आहे. सेवानिवृत्त अधिकारी व कर्मचाऱ्यांची सेवा घेण्यास विद्यापीठाने सुरुवात केली आहे. यातील सुमारे १० अधिकारी तर एप्रिल महिन्यातच रुजूदेखील झाले. शिवाय या आठवड्यातदेखील विद्यापीठाने २ ते ३ सेवानिवृत्त कर्मचारी व अधिकाऱ्यांना रुजू होण्यासंदर्भात पत्र दिले आहे.हे कर्मचारी व अधिकारी सुमारे दीड लाख पदवी प्रमाणपत्रांचे वाटप तसेच प्राधिकरणांच्या निवडणुकांच्या कामात सहभागी होणार आहेत. आश्चर्याची बाब म्हणजे यातील अनेक कर्मचारी व अधिकाऱ्यांना तंत्रज्ञानाचा गंधदेखील नाही. कुलगुरूंच्या ‘व्हीजन’मध्ये कुठेही हे लोक ‘फिट’ बसत नाहीत. परंतु तरीदेखील प्रशासनाचा गाडा ओढण्यासाठी नाईलाजाने त्यांची सेवा विद्यापीठाला घ्यावी लागत आहे. (प्रतिनिधी)
‘टायर्ड’ विद्यापीठाला ‘रिटायर्ड’चा आधार
By admin | Updated: May 17, 2015 03:01 IST