रोटरी क्लब आॅफ साऊथचे आयोजन
नागपूर : भारतीय चित्रपट संगीतात मूळ बंगाली संगीतकारांचे योगदान वादातीत आहे. बंगाल हा प्रांत तसा रसिक आणि कलेवर प्रेम करणारा. त्यामुळेच बंगालमध्ये शास्त्रीय संगीताची आवड प्रामुख्याने आहे. मूळ बंगाली पार्श्वभूमीतून आलेल्या अनेक संगीतकारांनी नंतर मुंबईत चित्रपटांना संगीत देताना बंगाली स्पर्श असलेले आणि शास्त्रीय रागदारीवर आधारित गीतांनी तमाम रसिकांना वेड लावले. याच गीतांचा एक अनोखा कार्यक्रम रोटरी क्लब आॅफ साऊथच्यावतीने डॉ. देशपांडे सभागृहात सादर करण्यात आला. स्वरमधुराच्या गायक आणि वादक कलावंतांनी तयारीने सादरीकरण करीत हा कार्यक्रम रंगविला. कार्यक्रमाचा प्रारंभ राजेश दुरुगकरने ‘राही मनवा...’ या गीताने केला. त्यानंतर त्याने ‘जब दिल ही टूट गया...’ या गीताने रसिकांची दाद घेतली. श्रद्धा जोशीने ‘जा रे जा...’ तर मंजिरी वैद्यने ‘घडी घडी मेरा दिल... मेरा नाम चिन चि चू..., ओ बेकरार दिल...’ आदी गीतांनी रंगत आणली. राजेश दुरुगकर, मंजिरी वैद्य, विजय चिवंडे, श्रद्धा जोशी, अमोल या गायकांनी यावेळी तयारीने सादरीकरण करून रसिकांना जिंकले. कार्यक्रमात ‘ये रात ये चांदनी..., सुन मेरे..., जाता कहाँ हे..., कुछ दिल ने कहाँ..., दिल पुकारे..., होठो मे ऐसी बात..., जिंदगी कैसी है पहेली..., दम मारो दम..., एक चतुर नार..., पिया बावरी..., तुम भी चलो..., सारा प्यार हमारा..., पल पल दिल के पास..., माना हो तुम..., कुछ ना कहो..., ये हवाएं...’ आदी गीते सादर करण्यात आली. गायकांना आॅक्टोपॅडवर नंदू गोहाणे, तबला अशोक टोकलवार, ढोलकीवर रघुनंदन परसटवार, बासरी अरविंद उपाध्ये, महेंद्र ढोले आणि गोविंद गडीकर की-बोर्डवर, गिटारवर पांडे यांनी सुयोग्य साथसंगत केली. कार्यक्रमाचे अभ्यासपूर्ण आणि रसाळ संवाद साधणारे निवेदन नासिर खाँ यांनी केले. (प्रतिनिधी)