लोकमत न्यूज नेटवर्क
नागपूर : मनपाच्या एनडीएस पथकाने शहरातील शहरात दोन ठिकाणी धाड टाकून ८०० किलो प्लास्टिक पिशव्या जप्त केल्या, तसेच १५ हजार रुपयांचा दंड ठोठावला. दरम्यान, कोविड नियमांचे उल्लंघन केल्याप्रकरणी बुद्ध नगर व सतरंजीपुरा येथील शिकवणी वर्गावरही कारवाई करीत २० हजारांचा दंड ठोठावण्यात आला.
शिकवणी वर्गही आता एनडीएस पथकाच्या रडारवर आले आहेत. शनिवारी दोन ट्यूशन क्लासेसवर कोविड नियमांच्या उल्लंघनासंदर्भात कारवाई करण्यात आली. आसीनगर झोनच्या पथकाने बुद्ध नगर येथील एका ट्यूशन क्लासवर कारवाई केली. येथे कोविड नियमांचे सर्रासपणे उल्लंघन केले जात होते. बुद्ध नगरातील शिकवणी वर्गावर १५ हजार, तर सतरंजीपुऱ्यातील शिकवणी वर्गाला ५ हजार रुपयांचा दंड ठोठावण्यात आला.
८०० किलो प्लास्टिक जप्त,
३५ हजारांचा दंड
पहिली कारवाई इतवारी येथील पारस प्लास्टिकवर करण्यात आली. इतवारीत मोठ्या प्रमाणावर प्लास्टिक पिशव्या आल्या असल्याची माहिती एनडीएस पथकाला मिळाली होती. त्या आधारावर मनपाच्या गांधीनगर व सतरंजीपुरा झोनच्या पथकाने कारवाई केली. पारस प्लास्टीकचे जनाव कदीर यांच्यावर दुसऱ्यांदा कारवाई करण्यात आली. त्यांना १० हजारांचा दंड ठोठावण्यात आला.
तसेच झांशी राणी चौकातील बॉम्बे सेल्स यांच्याकडून ५० किलो नॉन ओवन व प्लास्टिकच्या पिशव्या जप्त करण्यात आल्या. पहिलीच कारवाई असल्याने ५ हजाराचा दंड ठोठावण्यात आला.