नागपूर : महाराष्ट्र प्रदेश काँग्रेस कमिटीचे अध्यक्ष नाना पटोले यांनी नवनियुक्त प्रदेश पदाधिकाऱ्यांना जबाबदाऱ्यांचे वाटप केले असून अतुल लोंढे यांच्याकडे मुख्य प्रवक्तेपदाची, तर विशाल मुत्तेमवार यांच्यावर सोशल मीडिया राज्य प्रभारीपदाची जबाबदारी सोपविण्यात आली आहे. (New responsibilities on Pradesh Congress office bearers; Distributed by Nana Patole)
आघाडी संघटना, विभाग व सेल या विभागाच्या प्रमुखपदी माजी मंत्री व प्रदेश उपाध्यक्ष डॉ. सुनिल देशमुख यांची नियुक्ती करण्यात आली असून सहप्रमुख म्हणून सरचिटणीस आ. अभिजित वंजारी जबाबदारी सांभाळतील.
प्रदेश काँग्रेसच्या कामात सुसूत्रता व वेग यावा यासाठी प्रदेशाध्यक्ष नाना पटोले यांनी विविध समित्यांची रचना करून नवनियुक्त पदाधिकाऱ्यांना जबाबदारीचे वाटप केले आहे. लोंढे यांनी गेली दोन वर्षे प्रसारमाध्यमांसमोर पक्षाचा किल्ला लढविला. याचे बक्षीस त्यांना मिळाले आहे, तर, सोशल मीडियाच्या माध्यमातून काँग्रेसची ध्येय-धोरणे जनतेपर्यंत पोहोचविण्यासोबतच विरोधी पक्षांकडून होणाऱ्या विखारी प्रचारालाही उत्तर देण्याची जबाबदारी आता विशाल मुत्तेमवार यांच्यावर आली आहे. विशाल हे महाराष्ट्र प्रदेश काँग्रेस कमिटीचे महासचिव असून अखिल भारतीय काँग्रेस समितीचे मीडिया पॅनलिस्ट व चंद्रपूर शहर आणि जिल्ह्याचे प्रभारी म्हणून त्यांनी जबाबदारी सांभाळली आहे.