गोंदिया : येथील प्रस्तावित शासकीय वैद्यकीय महाविद्यालयासाठी शासनाने पुरेशी जागा उपलब्ध करून दिली नसल्याच्या कारणावरून वैद्यकीय परिषदेने हा प्रस्ताव नामंजूर केला आहे. मात्र यासाठी आता शासनाने १५ हेक्टर जागा उपलब्ध करून दिल्याने राज्य शासनाच्या वतीने याबाबतचा पुनर्प्रस्ताव मंजुरीसाठी पाठविला आहे. जिल्ह्यात शासकीय वैद्यकीय महाविद्यालयासाठी अनेक वर्षांपासून स्थानिक लोकप्रतिनिधींचे प्रयत्न सुरू आहेत. पुनर्प्रस्ताव मंजूर होण्यासोबतच यावर्षी शासकीय वैद्यकीय महाविद्यालय सुरूही होईल, असा विश्वास आमदार गोपालदास अग्रवाल यांनी प्रसिद्धी पत्रकातून व्यक्त केला आहे. राज्य शासनाने महाराष्ट्रात सात शासकीय वैद्यकीय महाविद्यालयांना मंजुरी दिली होती. त्यापैकी गोंदिया, बारामती व चंद्रपूर या तीन शासकीय महाविद्यालयांसाठी शासनाने जागा उपलब्ध करून दिली. गोंदिया येथील शासकीय वैद्यकीय महाविद्यालय सुरू करण्यासाठी सर्व मूलभूत सोयी या ठिकाणी उपलब्ध असल्याने महाविद्यालयाचा अग्रिम प्रस्ताव भारतीय वैद्यकीय परिषदेकडे (मेडिकल कौन्सिल आॅफ इंडिया) सादर करण्यात आला होता. त्यात राज्य शासनाच्या वतीने आवश्यक जमीन वनकायद्यातून मुक्त करून उपलब्ध करुन देण्यात येईल, असे हमीपत्र देण्यात आले होते. मात्र, या हमीपत्राला परिषदेने मंजुरी दिली नाही व जागा उपलब्ध करून प्रस्ताव परत पाठविण्याचे निर्देश देऊन प्रस्ताव नामंजूर केला होता. त्यानंतर गोंदिया जिल्ह्यात शासकीय वैद्यकीय महाविद्यालय सुरू होणार किंवा नाही, याबद्दल संभ्रमाची स्थिती निर्माण झाली होती. त्यातच आता येथे शासकीय महाविद्यालय सुरू होणारच नाही, अशी अफवा जिल्ह्यात पसरली होती. शासनाने कुडवा ग्रामपंचायतींतर्गत १५ हेक्टर वनभूमी वनकायद्यातून मुक्त करून वैद्यकीय महाविद्यालय मंजूर केल्याने राज्य शासनाच्या वैद्यकीय शिक्षण संचालकांमार्फत दि.२१/५/२०१४ रोजी प्रस्ताव परत मंजुरीसाठी पाठविण्यात आला आहे. जागेचा प्रश्न सुटल्याने आता गोंदिया येथील शासकीय वैद्यकीय महाविद्यालयाला निश्चितच परवानगी मिळेल, असे आ.अग्रवाल यांनी सांगितले. (जिल्हा प्रतिनिधी)
गोंदियातील मेडिकल कॉलेजसाठी नव्याने प्रस्ताव
By admin | Updated: May 27, 2014 01:48 IST