नागपूर : भरधाव वेगात असलेल्या बोलेरो पिकअप वाहनाने धडक दिल्यामुळे १३ वर्षाचा भाचा जागीच ठार झाला तर मामा गंभीर जखमी झाल्याची घटना पारडी पोलिस ठाण्यांतर्गत मंगळवारी सकाळी ८.४० वाजताच्या सुमारास घडली.
आयुष संतोष मिश्रा (वय १३) असे या अपघातात ठार झालेल्या भाच्याचे नाव आहे. आयुषचे मामा अजय हे बहिणीच्या घरीच राहतात आणि ई रिक्षा चालवितात. आयुष आपले मामा अजय रमाशंकर दुबे (वय २५, रा. सत्यमनगर, पारडी) यांच्यासह दुचाकी क्रमांक एम. एच. ४०, बी. व्ही-६७०७ ने पारडी चौकात कामानिमित्त आला होता. काम आटोपून ते भंडारा रोडने घरी परत जात होते. तेवढ्यात मागून येणाºया बोलेरो पिकअप वाहन क्रमांक एम. एच. ४०, बी. एल-१८२३ च्या चालकाने आपल्या ताब्यातील वाहन भरधाव वेगाने व निष्काळजीपणे चालवून त्यांच्या मोटारसायकलला धडक दिली.
घटनेनंतर बोलेरो चालक आपले वाहन तेथेच सोडून पळून गेला. अपघातात दुबे आणि त्यांचा भाचा आयुष गंभीर जखमी झाले. तेथे जमलेल्या नागरिकांनी दोघांनाही खासगी रुग्णालयात दाखल केले असता डॉक्टरांनी आयुषला तपासून मृत घोषित केले. या प्रकरणी दुबे यांनी दिलेल्या तक्रारीवरून पारडी पोलिसांनी बोलेरो चालकाविरुद्ध कलम ३०४ (अ), २७९, ३३८, सहकलम १३४, १७७ नुसार गुन्हा दाखल करून आरोपीचा शोध सुरु केला आहे.