नागपूर - रागाने (गुर्रावून) बघण्याच्या कारणावरून वाद झाल्यानंतर दोघांनी एका तरुणाची हत्या केली. सदर पोलीस ठाण्याच्या हद्दीत सोमवारी मध्यरात्री ही थरारक घटना घडली. अनिकेत सुनील तांबे (वय २५, मोहननगर) असे मृताचे नाव आहे. जय अशोक सोमकुवर (वय २८) आणि भूषण सुखदेव सोमकुवर (वय २६, दोघेही रा. गड्डीगोदाम) अशी आरोपींची नावे आहेत.
खासगी काम करणारा अनिकेत सोमवारी रात्री ११ च्या सुमारास त्याचा मित्र आयुष तांबे आणि दीपेश बुर्रेवार सोबत गड्डीगोदाममध्ये आला होता. तेथे त्याला त्याचा मित्र ऋषभ लोखंडे आणि भूषण सोमकुवर भेटले. अनिकेत आणि ऋषभ एक दुसऱ्याला मैत्रीतून शिवराळ भाषेत बोलू लागले. यावेळी गुर्रावून पाहाण्याच्या कारणावरून अनिकेतचा भूषणसोबत वाद झाला. तो हाणामारीवर गेला. दोघांच्या मित्रांनी त्यावेळी वाद सोडवला. अनिकेत तेथून मित्रांसोबत निघून गेला. रात्री १२.१५ च्या सुमारास पुन्हा घटनास्थळी आला. यावेळी भूषण आणि त्याचा पुतण्या जय सोमकुवर तेथे बसून होता. अनिकेतला पाहून चुलत्या पुतण्याने त्याच्याशी वाद घातला आणि आरोपी जुजय सोमकुवर याने अनिकेतच्या गळ्यावर चाकू मारून त्याला गंभीर जखमी केले. त्याला रुग्णालयात नेले असता डॉक्टरांनी मृत घोषित केले. या घटनेची माहिती कळताच सदर पोलीस घटनास्थळी आणि आरोपींच्या घरी पोहचले. त्यांनी दोघांनाही अटक केली.
आरोपी सराईत गुन्हेगार
आरोपी जय सोमकुवर सराईत गुन्हेगार आहे. त्याच्याविरुद्ध अनेक गंभीर गुन्हे दाखल आहेत. ते डेकोरेशनचा व्यवसाय करतात. तर, अनिकेत हा वस्तीतील क्रिकेट संघटनेचा सभासद होता. खेळ आणि सामाजिक उपक्रमात तो नेहमी समोर राहायचा.