लोकमत न्यूज नेटवर्कनागपूर : घराकडे जात असलेल्या जेसीबी चालकावर दोन आरोपींनी धावत्या दुचाकीवरून चाकूहल्ला करून त्याला गंभीर जखमी केले. कळमना पोलीस ठाण्याच्या हद्दीतील भरतवाडा मार्गावर बुधवारी रात्री ही घटना घडली. प्रकाश तुकाराम पाडगावकर (४३) हे या हल्ल्यात गंभीर जखमी झाले.शारदा चौकाजवळच्या भवानी नगरात पाडगावकर राहतात. ते जेसीबी चालक आहेत. बुधवारी रात्री ८.४० च्या सुमारास दुचाकीवरून ते आपल्या घराकडे जात होते. भरतवाडा गावाकडे जाणाऱ्या मार्गावर असलेल्या गायत्री डेअरीजवळ मागून दुचाकीवर आलेल्या दोन आरोपींनी त्यांच्या पाठीवर चाकूचे वार केले आणि त्यांची हत्या करण्याचा प्रयत्न केला. या हल्ल्यात पाडगावकर गंभीर जखमी झाले. त्यांनी मदतीसाठी आरडाओरड केल्यामुळे बाजूची मंडळी धावली. त्यामुळे आरोपी पळून गेले. जखमी पाडगावकर यांना मेयो इस्पितळात दाखल करण्यात आले. माहिती कळताच कळमना पोलीस तेथे पोहोचले. त्यांनी पाडगावकर यांचे बयाण नोंदवून घेतले. हल्ला करणाऱ्याला आपण ओळखत नसल्याचे पाडगावकर यांनी पोलिसांना सांगितले. हा प्राणघातक हल्ला कोणत्या कारणावरून झाला, ते उघड झाले नाही. कळमना पोलिसांनी या प्रकरणी हत्येचा प्रयत्न केल्याच्या आरोपाखाली अज्ञात दोन आरोपींविरुद्ध गुन्हा दाखल केला. त्यांचा शोध घेतला जात आहे.
नागपुरात धावत्या दुचाकीवरून चाकूहल्ला
By लोकमत न्यूज नेटवर्क | Updated: September 10, 2020 21:51 IST