नागपूर : झुंड चित्रपटाचे दिग्दर्शक नागराज मंजुळे हे नागपुरात आहेत. काल (दि. ४) कोराडी येथे एका कार्यक्रमात त्यांचा जाहीर सत्कार करण्यात आला. तर, आज मंजुळेंनी विरोधी पक्षनेते देवेंद्र फडणवीस यांची भेट घेतली. यावेळी त्यांनी चित्रपटाच्या चित्रीकरणासाठी मिळालेल्या मदतीबद्दल फडणवीस यांचे आभार मानले. यावेळी चंद्रशेखर बावनकुळेदेखील तिथे उपस्थित होते.
नागराज मंजुळेंचा झुंड हा चित्रपट काही दिवसांपूर्वी प्रदर्शित झाला. या चित्रपटाला बॉक्स ऑफिसवर हवे तसे यश मिळाले नसले तरी याची देशभरात चर्चा झाली. या चित्रपटाच बहुतेक चित्रीकरण हे नागपुरात झालं आहे. झुंडच्या चित्रीकरणादरम्यान देवेंद्र फडणवीस आणि चंद्रशेखर बावनकुळे यांनी खूप मदत केली होती. त्यामुळे त्यांचे आभार मानण्यासाठी आलो असल्याचे मंजुळे म्हणाले.
दरम्यान, काल कोराडीत आयोजित कार्यक्रमात मंजुळेंचा जाहीर सत्कार करण्यात आला. यावेळी ते भारावून गेले होते.उपराजधानी नागपूर येथे कलाकारांची कमी नाही, कला रसिकही मोठ्या प्रमाणात आहेत, म्हणूनच नागपूरकरांनी मला भरभरून प्रेम दिले आहे, माझा उत्साह वाढवला आहे. या कार्यक्रमाची गर्दी मला अनपेक्षित आहे, एवढा जनसमुदाय पाहून मी अक्षरश: भारावलो आहे. आगामी काळात उपराजधानीतून आणखी एक सिनेमा काढण्याचा मानस असल्याचे प्रतिपादनही नागराज मंजुळे यांनी केले.