नागपूर : मोबाइल दाखविण्याच्या बहाण्याने एका व्यक्तीने तीन वर्षांच्या मुलीसोबत अश्लील कृत्य केले. वेळेत हा प्रकार समोर आल्याने पुढील अनर्थ टळला. प्रतापनगर पोलिस ठाण्याच्या हद्दीत हा संतापजनक प्रकार घडला.
राजू देवचंद वघारे (३६) असे आरोपीचे नाव आहे. तो एका घरी किरायाने राहतो. जवळच राहणाऱ्या एक तीन वर्षीय मुलगी खेळण्यासाठी येत होती. राजूने तिला मोबाइल दाखविण्याच्या बहाण्याने घरी बोलविले. निरागस मुलगी घरात गेली व त्याने तिच्याशी अश्लील कृत्य केले. यामुळे मुलगी रडायला लागली. मुलीचा आवाज ऐकून बाजूच्या घरातील एक व्यक्ती आले व त्यांच्या लक्षात हा प्रकार आला. त्यांनी राजूला हटकले व मुलीला तिच्या घरी पोहोचविले. या कालावधीत राजू फरार झाला. मुलीच्या वडिलांनी प्रतापनगर पोलिस ठाण्यात तक्रार दिली. पोलिसांनी राजूविरोधात विनयभंग व पोक्सो कायद्याअन्वये गुन्हा दाखल करून अटक केली आहे.