नागपूर : मोबाईलवरून झालेल्या वादानंतर संतापलेल्या मुलाने स्वत:च्या आईची गळा दाबून हत्या केली. त्यानंतर ‘तो मी नव्हेच’ असे दाखवत आईच्या अंत्यसंस्काराच्या तयारीलादेखील लागला. मात्र मृतदेह कडक होत असल्याने तूप लावत असताना लहान मुलाला गळ्यावर जखमेची खूण दिसली व त्यानंतर हत्येची बाब समोर आली. हुडकेश्वर पोलीस ठाण्याच्या हद्दीत ही घटना घडली.
कमलाबाई गुलाबराव बडवाईक (४७, श्री संत गजानन महाराज नगर) असे मृतक महिलेचे नाव आहे. कलमाबाई यांचा पती फार अगोदर घर सोडून निघून गेला होता. त्या मोठा मुलगा रामनाथ (२८) याच्यासोबत राहत होत्या. तर लहान मुलगा दीपक (२६) हा मनिषनगरात राहतो. १८ ऑक्टोबर रोजी दीपकला त्याच्या मित्राने फोन करून आईची प्रकृती खराब झाल्याने रामनाथने दवाखान्यात नेल्याची माहिती दिली. दीपक दवाखान्याकडे निघाला असता त्याच्या बायकोचा फोन आला व आई मरण पावल्याचे तिने सांगितले. अंत्यसंस्काराची तयारी सुरू असताना दीपकच्या जावयाला कमलाबाई यांचा मृतदेह कडक होत असल्याचे लक्षात आले. त्यांनी कापूर व तेल लावण्यास सांगितले. त्यानुसार दीपक तेल लावत असताना त्याला कमलाबाई यांच्या गळ्याजवळ जखम दिसली.
तसेच डाव्या हाताच्या अंगठ्याला शाई लागली होती. त्यांच्या अंगावरील दागिनेदेखील गायब होते. याबाबत रामनाथला विचारणा केली असता त्याने उडवाउडवीची उत्तरे दिली. यामुळे दीपकला मोठ्या भावावर संशय आला व त्याने हुडकेश्वर पोलीस ठाण्यात तक्रार दिली. पोलिसांनी कमलाबाई यांचा मृतदेह पोस्टमार्टमसाठी पाठविला. डॉक्टरांनी त्यांचा मृत्यू गळा दाबून झाल्याचा अहवाल दिला. रामनाथच्या शेजाऱ्यांनी त्याचे कमलाबाईंशी फोनवर भांडण झाल्याची माहिती दिली. पोलिसांनी यावरून रामनाथला ताब्यात घेऊन विचारणा केली असता त्याने वादातून आईचा गळा दाबून हत्या केल्याची कबुली दिली. पोलिसांनी रामनाथला अटक केली आहे.