सुमेध वाघमारेलोकमत न्यूज नेटवर्कनागपूर : कोरोनाची अतिसौम्य लक्षणे असणाऱ्या रुग्णांना कोविड केअर सेंटर (सीसीसी) किंवा घरी स्वतंत्र सोय असल्यास विलगीकरण म्हणजे ‘होम आयसोलेशन’ करण्याचे निर्देश आहेत. परंतु सोय नसतानाही बहुसंख्य रुग्ण होम आयसोलेशनचा पर्याय निवडत आहेत. परिणामी, घरातील सदस्यच नव्हे तर शेजाऱ्यांनासुद्धा कोरोनाचा धोका निर्माण झाला आहे. विशेष म्हणजे, नागपूर जिल्ह्यातील १७ सीसीसीमध्ये ४७६ रुग्ण तर होम आयसोलेशनमध्ये तब्बल ५,२७३ रुग्ण आहेत. रुग्णवाढीला असे होम आयसोलेशन कारण ठरत नाही ना? असा प्रश्न उपस्थित केला जात आहे.
कोरोनाचे निदान झालेल्या रुग्णांना वैद्यकीयदृष्ट्या लक्षणांनुसार वर्गीकृत केले जाते. लक्षणे नसलेले, सौम्य किंवा अतिसौम्य लक्षणे, मध्यम तीव्र लक्षणे व तीव्र लक्षणांनुसार रुग्णांना कोविड केअर सेंटर, डेडिकेटेड कोविड हेल्थ सेंटर किंवा डेडिकेटेड कोविड हॉस्पिटल येथे दाखल केले जाते. परंतु आता नव्या मार्गदर्शक सूचनांनुसार अति सौम्य किंवा लक्षणे नसलेल्या कोविड पॉझिटिव्ह रुग्णांंना जर त्यांच्या घरामध्ये योग्यप्रकारे सुविधा उपलब्ध असेल तर त्यांच्या संमतीनुसार होम आयसोलेशन केले जाते. त्यापूर्वी संबंधित डॉक्टरला रुग्णास लक्षणे नसल्याबद्दल वैद्यकीयदृष्ट्या प्रमाणित करावे लागते. होम आयसोलेशनमध्ये रुग्णाला हवेशीर बंद खोलीत राहावे लागते, शक्यतो स्वतंत्र शौचालय असावे लागते, घरात फिरण्यावर बंधने असतात, घराबाहेर पडण्यावर प्रतिबंध असतो, सर्जिकल मास्क वापरणे व दर सहा ते आठ तासाने बदलावे लागते, मास्कचे विघटन करण्यासाठी बीच सोल्यूशन (५ टक्के) अथवा सोडियम हयपोक्लोराईट (५ टक्के) वापरून मास्क डिसइनफेक्ट करावे लागते, घरी दिवस-रात्र काळजी घेणारी व्यक्ती असावी लागते. मोबाईलवरील आरोग्य सेतू अॅपवर अॅक्टिव्ह असावे लागते, या सर्व सोयी असल्यावरच व तसे रुग्णाने प्रतिज्ञापत्र लिहून दिल्यावरच रुग्णाला होम आयसोलेशन केले जाते. परंतु नागपुरात सर्वच स्तरात पसरलेल्या कोरोनाचे रुग्ण पाहिल्यास अनेकांच्या घरी सोयी नसतानादेखील होम आयसोलेशन होत आहे. हे धक्कादायक असल्याचे वैद्यकीय तज्ज्ञांचे म्हणणे आहे.-शहरात पाच सीसीसीमधील दोन पूर्णत: रिकामेनागपूर जिल्ह्यात बुधवारी सर्वाधिक रुग्णांची नोंद झाली. १०९६ रुग्ण पॉझिटिव्ह आले. रुग्णसंख्या १६,७३३ वर पोहचली. ७,९७९ रुग्ण उपचार घेत आहेत. यातील केवळ २५४ रुग्ण सीसीसीमध्ये आहेत. शहरात आमदार निवास, व्हीएनआयटी, पाचपावली, वनामती व ओरिएन्ट ग्रॅण्ड या खासगी हॉटेल्समध्ये सीसीसी सुरू आहे. परंतु ओरिएन्ट ग्रॅण्ड हॉटेल व वनामती सीसीसी पूर्णत: रिकामे आहे. तर आमदार निवासात १४९, व्हीएनआयटीमध्ये ४३ तर पाचपावली सीसीसीमध्ये ६२ रुग्ण उपचार घेत आहेत.-ग्रामीणमध्ये २२२ रुग्णच सीसीसीमध्येग्रामीण भागात बुधवारपर्यंत ग्रामीणमध्ये ४,२१३ पॉझिटिव्ह रुग्णांची नोंद होती. यातील २२२ रुग्णच सीसीसीमध्ये आहेत. तसे पाहिल्यास विविध १२ तालुक्यात सीसीसी सुरू करण्यात आले. परंतु कुठे चार तर कुठे ४५ रुग्ण दाखल आहेत. येथेही मोठ्या संख्येत रुग्णांनी होम आयसोलेशनचा पर्याय निवडला आहे.