प्रतापनगरात गुंडांचा हैदोस

लोकमत न्यूज नेटवर्क

नागपूर : जोरात बुलेट चालवून फटाके फोडणाऱ्या आरोपीला हटकले म्हणून त्याने आपल्या साथीदाराच्या मदतीने एका तरुणाच्या घरावर हल्ला केला. तेथे तोडफोड करतानाच आरोपींनी तरुणाला आणि त्याच्या आईला जबर मारहाण केली. प्रतापनगर पोलीस ठाण्याच्या हद्दीत लोखंडे नगरात शुक्रवारी रात्री ८.१५ च्या सुमारास ही घटना घडली. मयूर विकास सेलोकर आणि त्याची आई आरोपींच्या हल्ल्यात जबर जखमी झाले आहेत.

आरोपी प्रणय ऊर्फ मंत्री वसंतराव पुराम आणि त्याचा साथीदार वैभव वाघाडे हे दोघे शुक्रवारी रात्री मयूरच्या घरासमोरून जोरात बुलेट चालवून सायलेन्सरमधून फटाके फोडत होते. त्यामुळे मयूरने आरोपींना हटकले. त्याचा राग धरून आरोपी प्रणय, वैभव यांनी आपल्या सात ते आठ साथीदारांसह शुक्रवारी रात्री मयूरच्या घरावर हल्ला चढवला. त्याच्या घराच्या खिडक्यांची तोडफोड करून त्याला आणि त्याच्या आईला काठी तसेच विटा, दगडांनी हल्ला करून जबर जखमी केले. या घटनेमुळे परिसरात दहशत निर्माण झाली. माहिती कळताच प्रतापनगर पोलीस तेथे पोहोचले. त्यांनी मयूरची तक्रार नोंदवून घेत आरोपी प्रणय तसेच वैभवला अटक केली, त्यांच्या साथीदारांचा शोध घेतला जात आहे.