भंडारा : रुग्णालयातील उपचाराच्या पैशावरून पती-पत्नीत झालेल्या वादात पतीने शिंगाडे कापण्याच्या कात्रीने पत्नीवर हल्ला केल्याची घटना पवनी तालुक्यातील नेरला येथे घडली.
चंद्रकला धनराज दिघोरे (३१) रा. नेरला असे जखमी महिलेचे नाव आहे. आपल्या मुलाच्या वाढदिवसाचा कार्यक्रम संपवून ती ओसरीत बसली होती. त्यावेळी पती धनराज दिघोरे त्याठिकाणी आला. तू मागच्या वर्षी विष घेतले होते तेव्हा खासगी दवाखान्यात दीड लाख रुपये खर्च आला. असे म्हणत वाद घातला. त्यावर चंद्रकलाने मी सरकारी दवाखान्यात उपचार केले असते असे सांगितले. त्यावरून रागाच्या भरात धनराजने शिंगाडे कापण्याच्या कात्रीने पत्नीच्या डोक्यावर हल्ला केला. त्यात ती जखमी झाली. तिला उपचारासाठी रुग्णालयात दाखल करण्यात आले. याप्रकरणी धनराज विरुद्ध गुन्हा दाखल करण्यात आला आहे.