अपंग वन्यप्राण्यांना पाठविले महाराज बागेत

पेंच एनक्लोजरमधील एका नर वाघाला वन विभागातर्फे पुणे येथील कात्रज प्राणिसंग्रहालयात पाठविण्यात येत असल्याची माहिती आहे. दरम्यान महाराज बाग प्रशासनाने वरिष्ठ वन अधिकाऱ्यांना

सुदृढ पाठवण्यास टाळाटाळ : प्राणिसंग्रहालय प्रशासनाने लिहिले नाराजी पत्र नागपूर : पेंच एनक्लोजरमधील एका नर वाघाला वन विभागातर्फे पुणे येथील कात्रज प्राणिसंग्रहालयात पाठविण्यात येत असल्याची माहिती आहे. दरम्यान महाराज बाग प्रशासनाने वरिष्ठ वन अधिकाऱ्यांना पत्र पाठवून नाराजी व्यक्त केली आहे. सूत्रांनुसार प्राणिसंग्रहालयातील अधिकाऱ्यांचे म्हणणे आहे की, वन विभागाल जेव्हा आजारी आणि अपंग वन्य प्राण्यांना देखरेखीसाठी ठेवायचे असते तेव्हा महाराज बागेची आठवण होते. परंतु जेव्हा सुदृढ वाघ देण्याची वेळ आली तेव्हा विदर्भाच्या बाहेर नर वाघ पाठविण्याबाबत विचार केला जात आहे. हा एकप्रकारे महाराज बागेसोबत सावत्र वागणुकीचा प्रकार आहे. प्राणिसंग्रहालयातील अधिकाऱ्यांनुसार वन विभागाच्या माध्यमातून प्राणिसंग्रहालयात ठेवण्यात आलेल्या तीन मादा वाघिणींंसाठीच पेंचमधील नर वाघ महाराज बागेत आणण्याचे प्रयत्न केले जात होते. यानंतरही नर वाघाला पुण्यातील कात्रज प्राणिसंग्रहालयाला देण्याचा निर्णय अयोग्य आहे. ३ नोव्हेंबर २००८ रोजी वन अधिकाऱ्यांनी चंद्रपूर येथील मेंढकी गावात आजारी पडलेल्या जाई व जुई या वाघिणीला गंभीर अवस्थेत महाराज बागेत आणण्यात आले होते. जुईचा उपचारादरम्यान मृत्यू झाला. परंतु दुसरी वाघिण जाई ही आता ५ वर्षाची झाली आहे. तसेच २३ जानेवारी २००९ रोजी वन अधिकाऱ्यांनी आपल्या आईपासून दुरावलेल्या तीन आजारी वाघिणीला महाराज बागेत उपचारासाठी आणले. ली, जान आणि चेरी अशी त्यांची नावे ठेवण्यात आली होती. गेल्या वर्षी तीन वर्षाच्या चेरीला छत्तीसगड येथील प्राणिसंग्रहालयाला देण्यात आले. तिथे चेरीने एका वाघाला जन्म दिला. सध्या जान ४ वर्ष आणि जाई ५ वर्षाची झाली आहे. आता या वाघिणींना एका नर वाघाच्या सोबतीची गरज आहे. त्यादृष्टीने प्राणिसंग्रहालयाने वन विभागाला पेंच एनक्लोजरचा वाघ देण्याची मागणी केली होती. वन विभागाकडून ही मागणी पूर्ण होण्याची प्राणिसंग्रहालयाला अपेक्षाही होती. परंतु आता त्या वाघाला कात्रजला देण्यात येत असल्याच्या चर्चेने महाराज बागेतील वाघिणींना नर वाघाची साथ मिळण्याची अपेक्षा फोल ठरली आहे. का पाठविले जात आहे वाघाला प्राणिसंग्रहालयात पेंच एनक्लोजरमध्ये दोन वाघिण आणि एक नर वाघ आहे. यापैकी एका वाघिणीला तज्ज्ञांच्या टीमच्या रिपोर्टनुसार जंगलात सोडायचे आहे. परंतु नर वाघाला मात्र जंगलात सोडण्यास या टीमने अनफिट घोषित केले आहे. अशा परिस्थितीत त्या वाघाला जंगलात सोडता येणे शक्य नाही. त्यामुळे या वाघाला महाराज बाग किंवा कात्रज येथील प्राणिसंग्रहालयात पाठविण्याबाबत वन विभाग विचार करीत आहे. (प्रतिनिधी)