नागपूर : सिव्हिल लाईन्स परिसरातील शासकीय इमारत क्रमांक २ मधील सर्व शासकीय कार्यालये गत दोन दिवसांपासून अंधारात बुडाली आहेत. गत दोन दिवसांपासून या इमारतीमधील वीजपुरवठा खंडित झाला आहे. माहिती सूत्रानुसार, बुधवारी दुपारी ३ वाजताच्या सुमारास येथील स्पॅन्को नागपूर डिस्कॉम लिमिटेडचे (एसएनडीएल) ट्रान्सफॉर्मर पूर्णत: जळून खाक झाले. त्यामुळे येथील संपूर्ण वीजपुरवठा अचानक खंडित होऊन सर्व शासकीय कार्यालये जागीच थांबले. सर्व कार्यालयांमधील लाईट, संगणक, कूलर व पंख्यासह तिन्ही लिफ्ट बंद झाल्या होत्या. या बहुमजली इमारतीमध्ये सामाजिक वनीकरण, विभागीय कृषी कार्यालय, आदिवासी विकास, जात पडताळणी, माहिती अधिकार, अन्न व औषधी प्रशासन आणि स्वयंरोजगार विभागासह अनेक महत्त्वाची कार्यालये आहेत. मात्र गत दोन दिवसांपासून या सर्व कार्यालयांमधील वीजपुरवठा खंडित असल्याने, येथील सर्व कामकाज ठप्प पडले होते. गुरुवारी रात्री उशिरापर्यंत येथील वीजपुरवठा पूर्ववत झालेला नव्हता. एसएनडीएलने गुरुवारी येथील जळालेले ट्रान्सफॉर्मर काढून तेथे नवीन बसविले. परंतु तरीही रात्री उशिरापर्यंत या इमारतीमध्ये वीजपुरवठा पोहोचलेला नव्हता. विशेष म्हणजे, येथील अनेक कार्यालयांत अपंग अधिकारी व कर्मचारी काम करतात. बुधवारी अचानक वीजपुरवठा खंडित झाल्याने येथील तिन्ही लिफ्ट बंद झाल्या होत्या. त्यामुळे अनेक जण रात्री उशिरापर्यंत कार्यालयात अडकून पडले होते. शेवटी रात्री उशिरा एक लिफ्ट सुरू करून, त्या सर्व कर्मचार्यांना खाली उतरविण्यात आले. दुसरीकडे बुधवारी नागपुरातील तापमानाने यंदाचा उच्चांक गाठून ४५ अंश सेल्सिअसपर्यंत पोहोचले होते. अशास्थितीत येथील सर्व कार्यालयातील अधिकारी व कर्मचार्यांना दिवसभर अंधारासोबतच गरमीचाही सामना करावा लागला. त्यामुळे अनेक कर्मचारी कार्यालयाबाहेरील पोर्चमध्ये खुर्च्या टाकून बसलेले दिसून येत होते. तसेच विभागीय कृषी कार्यालयातील अधिकारी व कर्मचार्यांचा वेगळाच मनस्ताप सहन करावा लागला. बुधवारी दुपारी या कार्यालयातील बहुतांश अधिकारी व कर्मचारी खरीप आढावा बैठकीची पूर्वतयारी करीत होते. परंतु दुपारी ३ वाजता अचानक वीजपुरवठा खंडित झाल्याने सर्व संगणक बंद पडले होते. त्यामुळे सर्व अधिकारी व कर्मचार्यांची चांगलीच तारांबळ उडाली होती.(प्रतिनिधी)
शासकीय कार्यालयांत एसएनडीएलचा अंधार!
By admin | Updated: May 23, 2014 01:06 IST