करिअरचा पर्याय खुला : जवाहरलाल दर्डा अभियांत्रिकीची माहिती
यवतमाळ : बीएससी झालेल्या विद्यार्थ्यांना आता अभियांत्रिकीच्या थेट दुसर्या वर्षाला प्रवेश मिळणार आहे. चार वर्षीय अभियांत्रिकीचा अभ्यासक्रम केवळ तीन वर्षात पूर्ण करण्याची संधी मिळण्यासोबतच या विद्यार्थ्यांना अभियांत्रिकीत करिअर करण्याचा पर्याय खुला झाला आहे. बीएससी विद्यार्थ्यांना बी.ई. विद्यार्थ्यांच्या तुलनेत रोजगाराच्या अत्यंत कमी संधी आहेत. अशा विद्यार्थ्यांपुढे एमएससी, एम.फिल, बी.एड. या अभ्यासक्रमाशिवाय पर्याय नसतो. शैक्षणिक क्षेत्रात करिअर करायचे झाल्यास नेट/सेट परीक्षा उत्तीर्ण करणे अनिवार्य आहे. आता शासनाच्या तंत्रशिक्षण संचालनालयाने बीएससी विद्यार्थ्यांना अभियांत्रिकीच्या थेट दुसर्या वर्षाला प्रवेश देण्याची प्रक्रिया अवलंबिली आहे. तीन वर्षातच अभियांत्रिकी अभ्यासक्रम पूर्ण करण्यासोबतच कुठल्याही शाखेत बीएससी करणार्या विद्यार्थ्यांना अभियांत्रिकीच्या कोणत्याही शाखेसाठी प्रवेश मिळणार आहे. बीएससी बायोलॉजी केलेला विद्यार्थी अभियांत्रिकीतील कॉम्प्युटर, इलेक्ट्रॉनिक्स किंवा इन्फॉर्मेशन टेक्नॉलॉजी या शाखेची निवड करून आयटीमध्ये आपले करिअर घडवू शकतो. बीएससी विद्यार्थ्याला अभियांत्रिकीच्या कुठल्याही शाखेत प्रवेशासाठी कोणत्याही शाखेची बीएससी पदवी तसेच बारावी इंग्रजी आणि गणित विषय घेवून उत्तीर्ण असणे आवश्यक आहे. विद्यार्थी तंत्रशिक्षण संचालनालयाच्या केंद्रीय प्रवेश प्रक्रियेत सहभागी होवून शासनातर्फे अभियांत्रिकी प्रवेशासाठी शिक्षण शुल्कात मिळणार्या विविध सवलती आणि शिष्यवृत्तीचाही लाभ घेवू शकतात. अभियांत्रिकीला प्रवेश घेतलेले बीएससी पदवीधर विद्यार्थी इतर विद्यार्थ्यांच्या तुलनेत अभियांत्रिकी अभ्यासक्रम चांगल्यारीतीने पूर्ण करतात. अशा विद्यार्थ्यांना रोजगाराच्या संधीत इतर विद्यार्थ्यांच्या तुलनेत अधिक स्थान दिले जाते. त्यामुळे या संधीचा बीएससी विद्यार्थ्यांनी लाभ घ्यावा, असे आवाहन जवाहरलाल दर्डा अभियांत्रिकी महाविद्यालयाचे प्रवेश प्रक्रिया प्रमुख डॉ. संजय गुल्हाने यांनी केले आहे. अधिक माहितीसाठी ९८८१८३२१०० या क्रमांकाच्या भ्रमणध्वनीवर संपर्क करावा, असे कळविले आहे. (वार्ताहर)