धापेवाडा : कोरोनाच्या पार्श्वभूमीवर विदर्भाचे पंढरपूर धापेवाडा येथील देवशयनी एकादशी व आषाढी यात्रा रद्द करण्यात आली आहे. २० जुलैला होणारी आषाढी एकादशी यात्रा व २५ जुलैला होणारी आषाढी प्रतिपदा यात्रा रद्द करण्यात आल्याची माहिती श्री विठ्ठल-रुक्मिणी देवस्थानचे सचिव आदित्यप्रतापसिंह पवार यांनी दिली. तसेच विठुरायाच्या पूजेव्यतिरिक्त इतर परिपाठचे कार्यक्रम पूर्णपणे स्थगित करण्यात आले आहेत.
आषाढी एकादशीला व आषाढी प्रतिपदेला पंढरपूरचा पांडुरंग धापेवाड्यात अवतरतो अशी आख्यायिका आहे. त्यामुळे येथे एकादशीला मोठी यात्रा भरते. धापेवाड्यातील संत कोलबास्वामी मठ, वारामाय मठ, रघुसंत महाराज व मकरंदपुरी महाराज मठातील दिंड्या सायंकाळी नगरभ्रमण करतात. दूरवरून मोठ्या संख्येत दिंड्या व भाविक येथे येतात. मात्र यंदाही यात्रा स्थगित झाल्याने भाविकांना घरी बसूनच विठुरायाची पूजा करावी लागणार आहे.