नागपूर : काँग्रेस फक्त एक राजकीय पक्ष नाही तर एक विचारधारा आहे. ज्या पक्षासमोर ब्रिटिश सरकारने गुडघे टेकले त्या पक्षाला संपवणे कधीच शक्य नाही. काँग्रेस ना संपली, ना संपणार. ही विचारधारा जपण्यासाठी प्रत्येक कार्यकर्ता प्रयत्नांची पराकाष्टा करणार, असा निर्धार काँग्रेसच्या स्थापनादिनी करण्यात आला.
देवडिया काँग्रेस भवनात काँग्रेसचा १३७वा स्थापना दिन साजरा करण्यात आला. माजी शहर अध्यक्ष शेख हुसैन यांच्या हस्ते ध्वजारोहण करण्यात आले. यावेळी माजी केंद्रीय मंत्री विलास मुत्तेमवार, ओबीसी महासंघाचे अध्यक्ष डाॅ. बबनराव तायवाडे, उद्योग सेलचे प्रदेश अध्यक्ष अतुल कोटेचा, डाॅ. गजराज हटेवार, बंडोपंत टेभुर्णे, प्रा. दिनेश बानाबाकोडे, सेवादलाचे रामगोविंद खोंबाडगे, प्रवीण आगरे, महेश श्रीवास आदी उपस्थित होते.
यावेळी विलास मुत्तेमवार यांनी काँग्रेसचा इतिहास मांडला. काँग्रेसची विचारधारा तळागाळापर्यंत पोहोचवा व नागपूर शहरातून जास्तीत जास्त सदस्य नोंदणी करण्याचे आवाहन त्यांनी केले. अतुल कोटेचा यांनी महापालिका निवडणुकीसाठी प्रत्येकाने मिशन मोडवर काम करण्याची गरज व्यक्त केली.
नागपूर ग्रामीणमध्ये ध्वजारोहण
- जिल्हा ग्रामीण काँग्रेस कमिटी कार्यालयात जिल्हाध्यक्ष राजेंद्र मुळक यांच्या अध्यक्षतेखाली व जिल्हा परिषद अध्यक्ष रश्मी बर्वे यांच्या उपस्थितीत स्थापना दिन कार्यक्रम पार पडला. या वेळी प्रदेश उपाध्यक्ष किशोर गजभिये, माजी आ. एस.क्यू. जामा, तक्षशिला वाघधरे, संजय मेश्राम, तुळशीराम काळमेघ, वसंतराव गाडगे, अवंतिका लेकुरवाळे आदी उपस्थित होते.