नागपूर : प्रतिगामीवाद्यांनी सुपारी देऊन कॉम्रेड गोविंदराव पानसरे यांच्यावर भ्याड हल्ला केल्याचा आरोप करून त्यांच्या मारेकऱ्यांना त्वरित अटक करण्याची मागणी व्हेरायटी चौकात आयोजित निषेध सभेत करण्यात आली. आपल्या संतप्त प्रतिक्रिया व्यक्त करून व्हेरायटी चौकात सर्वपक्षीय पदाधिकाऱ्यांनी जोरदार नारेबाजी केली. कॉम्रेड गोविंदराव पानसरे यांच्या हत्येच्या निषेधार्थ शनिवारी व्हेरायटी चौकात तीव्र निदर्शने करण्यात आले. यावेळी भारतीय कम्युनिस्ट पक्ष, मार्क्सवादी कम्युनिस्ट पक्ष, फॉरवर्ड ब्लॉक, रिपब्लिकन पार्टी आॅफ इंडिया (गवई), रिपब्लिकन पार्टी आॅफ इंडिया सेक्युलर, संयुक्त जनता दल, अखिल भारतीय शिक्षा अधिकार मंच, सत्यशोधक शिक्षक सभा, महाराष्ट्र अंधश्रद्धा निर्मूलन समिती, जनसंघर्ष मंच, भारिप बहुजन महासंघ, प्रोग्रेसिव्ह लायर्स फोरम, रिपब्लिकन पँथर, प्रगतिशील लेखक संघ आदी पक्ष आणि संघटनांचे शेकडो पदाधिकारी, कार्यकर्ते एकत्र आले. त्यांनी गोविंदराव पानसरेंवरील भ्याड हल्ल्याचा तीव्र शब्दात निषेध नोंदवून जोरदार घोषणाबाजी केली. नरेंद्र दाभोळकरांच्या हत्येचे आरोपी अद्याप मोकाट असून पानसरेंवरील हल्ल्याचे आरोपीही सापडले नसल्यामुळे हे शासनाचे अपयश असल्याचा आरोप करण्यात आला. यावेळी बोलताना अरुण लाटकर यांनी पुरोगामी माणसाने विचार मांडावेत की नाही, असा प्रश्न उपस्थित करून रविवारी नागपूर बंदचे आवाहन केले. मोहनदास नायडु यांनी शासनाने मारेकऱ्यांना त्वरित अटक करून या हत्येमागील विचारधारा उघड करण्याची मागणी केली. ज्येष्ठ पत्रकार रणजित मेश्राम यांनी परिवर्तनवादी चळवळीच्या नायकाचा यातनादायी मृत्यू संतापजनक असल्याचे सांगून ही वेळ स्पष्ट भूमिका घेऊन दुष्ट प्रवृत्ती ठेचून काढण्याची असल्याचे मत व्यक्त केले. माजी आमदार एस. क्यु. जमा यांनी पानसरेंवरील हल्ला शरमेची बाब असून पानसरेंची लढाई पुढे नेण्याचे आवाहन केले. यावेळी मोहनदास नायडु, बाळ अलोणी, गीता महाजन, सुनील शेंडे, सुधाकर वाघुके, रवि टेंभुर्णे, अमृत मेश्राम, भीमराव खोब्रागडे, अरुण लाटकर, मनोहर मुळे, अरुण वनकर, बलवंतराय मेहता, परसराम राऊत, नरेंद्र पलांदूरकर, संजीवन वालदे, प्रकाश कुंभरे, दिनेश गोडघाटे, अशोक सरस्वती, दिनेश अंडरसहारे आदी उपस्थित होते.(प्रतिनिधी)
कॉ. पानसरेंच्या मारेकऱ्यांना त्वरित अटक करा
By admin | Updated: February 22, 2015 02:30 IST