नागपूर : जिल्हा परिषदेच्या महिला व बाल कल्याण विभागाने जिल्हा वार्षिक योजना (अनु.जाती उपयोजना आदिवासी क्षेत्र ) उपयोजनांतर्गत किशोरवयीन मुली, गरोदर व स्तनदा मातांसाठी अतिरिक्त आहार बिकॉझिंकच्या टॅबलेट देण्याचा निर्णय घेतला आहे. यापूर्वी अतिरिक्त आहाराच्या रूपात च्यवनप्राश पुरविण्यावर विभागाने शिक्कामोर्तब केले होते; मात्र तांत्रिक मान्यता न मिळाल्याने च्यवनप्राश ऐवजी बिटकॉझिंकच्या टॅबलेट देण्यात येणार आहेत.
महिला व बाल कल्याण समितीच्या बैठकीत हा निर्णय घेण्यात आला. २०२१-२२ या वर्षाकरिता जिल्हा वार्षिक योजना (अनु.जाती उपयोजना एससीपी) अंतर्गत ५० लाख, आदिवासी क्षेत्र उपयोजना (टीएसपी) अंतर्गत १० लाख, ओटीएसपी अंतर्गत १० लाख व एमएडीए अंतर्गत १० लाख अशा ८० लाखांच्या निधीतून अतिरिक्त आहाराची तरतूद करण्यात आली आहे. केंद्र सरकारच्या इएसआयसी नवी दिल्ली कार्यालयाकडून ई-निविदा दरकरार मंजुरी प्राप्त असलेल्या कंपनीला पुरवठा करण्यावर सदस्यांनी सहमती दर्शविली आहे. लवकरच टॅबलेटचा पुरवठा करण्यात येणार आहे.
- अतिरिक्त पोषण आहाराच्या रूपात देण्यात येणाऱ्या टॅबलेट या आरोग्य विभागातून प्रमाणित करण्यात आल्या आहेत. गरोदर व स्तनदा मातांच्या आरोग्यासाठी आवश्यक असलेले घटक या टॅबलेटमध्ये असल्याने त्यांच्या आरोग्यासाठी पोषक आहे.
उज्ज्वला बोढारे, सभापती, महिला व बाल कल्याण विभाग.