नागपूर : भारतासह जगात आणि महाराष्ट्रात ऐतिहासिक स्त्री-पुरुषांची नावे विविध वास्तूंना द्यायची जुनी परंपरा आहे. त्यांचे विचार-कृतीची ती प्रेरणास्थळे असतात. त्यामुळे त्यांच्या स्मृती चिरतरुण असतात. असाच काहीसा संकल्प नागपूर जिल्हा परिषदेच्या महिला व बालकल्याण समितीने केला आहे. विभागांतर्गत येणाऱ्या अंगणवाड्यांना प्रेरणादायी महिलांच्या नावाने नवी ओळख मिळणार आहे. जिल्ह्यातील सर्व अंगणवाड्यांवर प्रेरणादायी स्त्रियांच्या नावाच्या पाट्या लागणार असून, अंगणवाड्यांची ही नवी ओळख ठरणार आहे.
राज्यात पहिल्यांदाच ही संकल्पना जि.प.च्या महिला व बालकल्याण समितीने ठेवली. त्यासंदर्भात ठरावही मंजूर करून घेतला. देशाच्या इतिहासात अनेक महिलांचे कर्तृत्व वाखाणण्याजोगे राहिले आहे. सामाजिक क्षेत्राबरोबरच कला, क्रीडा, राजकारण, शिक्षण, विज्ञान, संशोधन, वैद्यकीय अशा सर्वच क्षेत्रात उत्तुंग काम करणाऱ्या आणि करीत असलेल्या महिलांच्या नावाने अंगणवाडी ओळखली जाणार आहे. नागपूर जिल्ह्यात २,१६१ अंगणवाड्या व २६२ मिनी अंगणवाड्या आहेत. प्रत्येक अंगणवाडीवर प्रेरणादायी महिलेच्या नावाची पाटी असणार आहे. सोबतच त्यांच्या छायाचित्रासह संक्षिप्त माहितीचा आढावा असणार आहे. क्रांतिज्योती सावित्रीबाई फुले यांच्या जयंतीच्या निमित्ताने या संकल्पनेची घोषणा महिला व बालकल्याण सभापती उज्ज्वला बोढारे यांनी केली.
- या देशात महिलांचे योगदान प्रेरणादायी आहे. गावातील अंगणवाडीच्या माध्यमातून समाजाला व लाभार्थ्यांना अशा थोर महिलांची प्रेरणा मिळण्याचा उद्देश आहे. सोबतच या माध्यमातून त्यांच्या स्मृतींना उजाळा मिळणार आहे.
-उज्ज्वला बोढारे, सभापती, महिला व बालकल्याण विभाग