नागपूर : हिंगणा परिसरात प्रोफेशनल कोर्सच्या तृतीय वर्षाला शिकत असलेली २० वर्षीय विद्यार्थिनी ऑटोत बसली असताना तिच्याशी अश्लील कृत्य करून तिचा विनयभंग करणाऱ्या आरोपीला अजनी पोलिसांनी गजाआड केले आहे.
कुणाल अनिल लोंदे (३२, रा. विद्यानगर, नंदनवन) असे अटक करण्यात आलेल्या आरोपीचे नाव आहे. तो खासगी कंपनीत जॉब करतो. तर पिडीत वाठोडा परिसरातील रहिवासी असलेली विद्यार्थिनी हिंगणा परिसरातील एका महाविद्यालयात प्रोफेशनल कोर्सच्या तृतीय वर्षाला शिकते. मागील अनेक दिवसांपासून आरोपी कुणाल हा विद्यार्थिनीचा पाठलाग करीत होता. विद्यार्थिनी बसलेली असलेल्या ऑटोतून तो प्रवास करून तिच्याशी जवळीक साधण्याचा प्रयत्न करायचा. आतापर्यंत ५ जानेवारी ते २९ मार्च २०२४ दरम्यान आरोपीने तीन-चार वेळा विद्यार्थिनीसोबत अश्लील चाळे केले. परंतु बदनामीच्या भितीने विद्यार्थिनीने ही बाब कुणालाही सांगीतली नाही.
शुक्रवारी सायंकाळी ५.३० वाजता पिडीत विद्यार्थिनी लोकमान्यनगर हिंगणा रोड येथून ऑटोत बसून घराकडे परत येत होती. आरोपी कुणालही विद्यार्थिनीच्या ऑटोत बसला. अजनी पोलिस ठाण्याच्या हद्दीत त्याने विद्यार्थिनीसोबत अश्लील चाळे करून तिच्या मनाला लज्जा होईल, असे कृत्य करून तिचा विनयभंग केला. आरोपीच्या नेहमीच्या त्रासाला कंटाळून पिडीत विद्यार्थिनीने अजनी पोलिस ठाण्यात तक्रार दिली. या प्रकरणी अजनी पोलिसांनी आरोपी कुणाल विरुद्ध कलम ३५४, ३५४ (अ), ३५४ (ड) नुसार गुन्हा दाखल करून आरोपीस अटक केली आहे.