नागपूर : नवरात्रीच्या पूर्वसंध्येला भरतवाडा रोड येथे झालेल्या भीषण अपघातात तरुणाच्या डोळ्यासमोर आईचा मृत्यू झाल्याची दु:खद घटना घडली. या प्रकरणात पोलिसांनी ट्रकचालकाविरोधात गुन्हा दाखल केला आहे. मायाबाई श्रावण मोरसिंगे (४७, देसाईगंज वडसा, गडचिरोली) असे त्या महिलेचे नाव आहे.
स्वप्नील श्रावण मोरसिंगे (२३, दुर्गानगर) हा मूळचा गडचिरोली जिल्ह्यातील असून, नोकरीच्या निमित्ताने तो मामाकडे राहतो. तो आई मायाबाई यांच्यासह मोटारसायकलने गावाला गेला होता. दुपारी तीन वाजताच्या सुमारास आईला परत घेऊन कळमना पोलीस ठाण्याच्या हद्दीतील गुलमोहर नगर, भरतवाडा मार्गे जात असताना मागून आलेल्या ट्रकने (एमएच ३१-सीबी ६४७३) त्यांना मागून जोरदार धडक दिली. यात स्वप्नील ट्रकच्या डाव्या बाजूला पडला, तर त्याच्या आईच्या पाठीवरून ट्रकचे चाक गेले. त्यात गंभीर जखमी झाल्याने त्यांचा जागीच मृत्यू झाला. हा प्रकार पाहून स्वप्नीलच्या तोंडातून शब्ददेखील फुटत नव्हते. घटनास्थळावरील लोकांनी त्याला धीर देत पोलिसांना बोलवले. पोलिसांनी ट्रकच्या चालकाविरोधात गुन्हा दाखल केला आहे.