दयानंद पाईकराव, नागपूर : मसाज पार्लरच्या नावाखाली सीताबर्डी परिसरात देह व्यापाराचा अड्डा चालविणाऱ्या महिलेस गुन्हे शाखेच्या सामाजिक सुरक्षा विभागाने अटक करून चार तरुणींची सुटका केली आहे.
मुस्कान उर्फ मनिषा अरविंद भारती (३५, रा. वसंतविहार वाडी) असे अटक करण्यात आलेल्या आरोपी महिलेचे नाव आहे. गुन्हे शाखेच्या सामाजिक सुरक्षा विभागाला ही महिला मसाज पार्लरच्या नावाखाली देह व्यापाराचा अड्डा चालवित असल्याची माहिती मिळाली होती. त्यानुसार शुक्रवारी १५ मार्चला सायंकाळी ६.१५ वाजता सामाजिक सुरक्षा विभागाने सिताबर्डी पोलिस ठाण्याच्या हद्दीत नॅचुरल युनिसेक्स सलून, पहिला माळा येथे धाड टाकली. तेथे आरोपी महिला मुस्कान ही आपल्या आर्थिक फायद्यासाठी तरुणींना पेशांचे आमीष दाखवून त्यांच्याकडून देहव्यापार करून घेताना आढळली.
पोलिसांनी तेथून ४ तरुणींची सुटका केली. आरोपी महिलेकडून ७८ हजारांचा मुद्देमाल जप्त करून तिच्या विरुद्ध सीताबर्डी ठाण्यात कलम ४, ५, ७, अनैतिक व्यापार प्रतिबंध कायदा १९५६ नुसार गुन्हा दाखल करण्यात आला. ही कारवाई पोलिस आयुक्त डॉ. रवींद्र कुमार सिंगल यांच्या मार्गदर्शनाखाली निरीक्षक कविता इसारकर, लक्ष्मण चौरे, सचिन बढीये, शेषराव राऊत, अश्वीन मांगे, समीर शेख, कुणाल मसराम, पुनम शेंडे यांनी केली.