दयानंद पाईकराव, नागपूर : भरधाव वाहनाने धडक दिल्यामुळे मॉर्निंग वॉक करणारा ५२ वर्षाचा व्यक्ती गंभीर जखमी झाला. ही घटना यशोधरानगर पोलिस ठाण्याच्या हद्दीत शुक्रवारी १२ जानेवारीला सकाळी ६ वाजताच्या सुमारास यशोधरानगर पोलिस ठाण्याच्या हद्दीत घडली. कृष्णा रामाजी जोहरे (वय ५२, रा. कुंदनलाल गुप्तानगर ) असे गंभीर जखमी झालेल्या व्यक्तीचे नाव आहे.ते शुक्रवारी सकाळी मॉर्निंग वॉकला गेले होते.
विटाभट्टी चौक ते कांजी हाऊस चौक दरम्यान अज्ञात वाहन चालकाने त्याच्या ताब्यातील वाहन भरधाव वेगाने निष्काळजीपण चालवून त्यांना धडक दिली. यात त्यांच्या डोक्याला, छातीला मार लागून ते गंभीर जखमी झाले. त्यांच्यावर मेडिकल कॉलेज हॉस्पिटलमध्ये उपचार सुरू आहेत. अपघातानंतर चालक वाहनासह फरार झाला. या प्रकरणी सुनिल जोहरे (वय ४०) यांनी दिलेल्या तक्रारीवरून यशोधरानगर पोलिसांनी गंभीर अपघाताचा गुन्हा दाखल करून वाहनचालकाचा शोध सुरू केला आहे.