मंगेश व्यवहारे, नागपूर: नागपूर महानगरपालिकेच्या वेगवेगळ्या झोनअंतर्गत कार्यरत १९ कामचुकार, बेशिस्त, सतत गैरहजर राहणाऱ्या कर्मचाऱ्यांवर महापालिका प्रशासनाने शिस्तभंगाची कठोर कारवाई करत निलंबित केले. दोन ऐवजदार सफाई कामगारांचे ऐवजी कार्डदेखील रद्द करण्याची कारवाई करण्यात आली.
मनपा आयुक्त डॉ. अभिजित चौधरी यांच्या निर्देशानुसार अतिरिक्त आयुक्त डॉ. सुनील लहाने यांनी निलंबनाचे आदेश निर्गमित केले आहेत. मनपाच्या घनकचरा व्यवस्थापन विभागाकडे विविध झोन कार्यालयांद्वारे कर्मचाऱ्यांचा बेशिस्तपणा, कामावर गैरहजर राहणे तसेच कामचुकारपणा केला जात असल्याबाबत तक्रारी प्राप्त झाल्या होत्या. विभागाद्वारे चौकशी करून दोषी कर्मचाऱ्यांवर कारवाई करण्यात आली. काही कर्मचाऱ्यांवर विभागीय चौकशीदेखील सुरू आहे. १९ निलंबित सफाई कर्मचाऱ्यांमध्ये धरमपेठ झोनमधील ६, गांधीबाग झोनमधील ३, नेहरूनगर, लकडगंज आणि मंगळवारी झोनमधील प्रत्येकी २ तसेच लक्ष्मीनगर, हनुमाननगर आणि धंतोली झोनमधील प्रत्येकी एका सफाई कामगाराचा समावेश आहे. सतरंजीपुरा झोनचे ऐवजदार सफाई कामगार प्रमोद शेंडे आणि मंगळवारी झोनचे रोशन मस्त यांचे ऐवज कार्ड रद्द करण्यात आले आहे.
- निलंबित सफाई कर्मचारी
शिस्तभंगाची कार्यवाही करीत मनपाद्वारे निलंबित करण्यात आलेल्या सफाई कर्मचाऱ्यांमध्ये तुषार पप्पू बिरहा, अलोक जावणे, धर्मेंद्र वासनिक, तुकाराम डागोर, कृष्णा ब्राह्मणकर, किशोर सोनोने, अनिल हुमणे, संतोष मोटघरे, सुकांत शिर्के, संदीप बनसोड, राहुल मोगरिया, सुनील कैथेल, कुणाल तांबे, रामू बक्सरे, अमित गोंडाणे, अभिजित बोरकर, पुंडलिक गुडधे, सुभाष ढोबळे आणि कमलेश राऊत यांचा समावेश आहे.