मुंबई : राज्यात झालेल्या राजकीय भूकंपानंतर शिंदे-फडणवीस सरकार सत्तेत आले असून महाविकास आघाडीने गेल्या अडीच वर्षात घेतलेले निर्णय माघारी घेण्याचा सपाटा सुरू केलाय. अशातच, भाजपकडून आणखी एक मागणी करण्यात आली आहे.
राज्यातील होऊ घातलेल्या जि.प., महापालिकेच्या निवडणुकांसाठी करण्यात आलेली प्रभाग रचना रद्द करून नव्याने प्रभाग रचना करण्यात याव्या, अशी मागणी भाजप नेते व आमदार चंद्रशेखर बावनकुळे यांनी केली आहे.
महाविकास आघाडी सरकारच्या कार्यकाळात तयार करण्यात आलेली प्रभाग रचना, गट रचना सदोष असून तोडून-मोडून तयार करण्यात आल्या आहेत. महाविकास आघाडीच्या नेत्यांनी अधिकाऱ्यांवर दबाव आणून नियमबाह्य करून आपल्या सोयीने प्रभाग रचना केल्याचा आरोप बावनकुळेंनी केला. त्यामुळे त्या रद्द करून नव्याने प्रभाग रचना करण्यात याव्या, अशी मागणी बावनकुळे यांनी केली. आम्ही निवडणूक आयोगाला पत्र लिहून स्थानिक स्वराज्य संस्थांमधील प्रभाग रचना नव्याने करण्यात याव्या अशी मागणी केली असल्याचे बावनकुळे म्हणाले.
स्थानिक स्वराज्य संस्थांच्या प्रलंबित निवडणुका सर्वोच्च न्यायालयाने घेण्याचे आदेश दिल्यानंतर प्रभाग रचना तसेच आरक्षण या संदर्भामध्ये गेल्या दोन महिन्यांपासून प्रक्रिया सुरू आहे. ही प्रक्रिया अंतिम टप्प्यात असतानाच भाजपने सर्व प्रभाग रचना रद्द करण्यात यावी, अशी मागणी केली आहे.
दरम्यान, राष्ट्रवादीचे आमदार अमोल मिटकरी यांनी सरकार स्थापन होण्याआधीच इतकी घाई कशासाठी? असा सवाल केला आहे. तर, या मागणीवर प्रतिक्रिया देताना भाजप आमदार राम कदम यांनी चंद्रशेखर बावनकुळे यांची मागणी योग्य असल्याचे म्हटले आहे.
शेख हुसैन यांच्यावर तत्काळ कारवाई करावी
नागपूरमध्ये काँग्रेसच्या मोर्चात शेख हुसैन यांनी पंतप्रधान मोदींबाबत आक्षेपार्ह वक्तव्य केलं होतं, याबाबत आम्ही तक्रार दाखल केली होती. परंतु, अजूनही पोलिसांनी यावर कायदेशीर कलमा लावून कारवाई केलेली नाही. याप्रकरणी पोलीस कमिश्नर यांना पुन्हा भेटून तत्काळ कार्यवाहीबाबत मागणी असल्याचे बावनकुळे म्हणाले. तसेच त्यांच समर्थन करणाऱ्यांवरही कारवाई करण्यात यावी, अशी मागणी करणार असल्याचे ते म्हणाले.