ऑनलाइन लोकमतबुलढाणा, दि. 26 - कोपर्डी घटनेतील आरोपींना फाशीची शिक्षा व अन्य मागण्यांसाठी सकल मराठा समाजाच्यावतीने काढण्यात येत असलेल्या क्रांती मोर्चाचे विराट दर्शन सोमवारी या ठिकाणी पाहायला मिळाले. या मोर्चामध्ये काटेकोर नियोजन व शिस्तबद्धता वाखाणण्याजोगी होती. बुलडाणा शहरात अत्र, तत्र, सर्वत्र केवळ माणसच माणसं दिसत होती. या मोर्चात तरुणी व महिलांचाही लक्षणीय सहभाग दिसून आला. या मोर्चात तब्बल १५ लाख मोर्चेकरी सहभागी असल्याचा दावा आयोजकांनी केला आहे.गत पंधरा दिवसांपासून मोर्चाची गावोगावी तयारी सुरू होती. नियोजनानुसार सोमवारी सकाळपासूनच गावातून जथ्थेच्या जथ्थे बुलडाण्यात दाखल होत होते. कोणत्याही पक्ष किंवा संघटनेच्या हाती सूत्रे नाहीत, अग्रभागी कुणी राजकीय पुढारी-नेता नाही, तरीही लाखोंच्या संख्येने एकत्र आलेल्या मराठा समाजाची शिस्त व शांतता या ठिकाणी बुलडाणेकरांना 'याचि देही याचि डोळा'अनुभवता आली.अहमदनगर जिल्ह्यातील कोपर्डी येथील मुलीवर झालेल्या अत्याचाराचा निषेध, अ‍ॅट्रॉसिटी कायद्यातील बदल आणि स्वामीनाथन आयोग लागू करणे या मागण्यांसोबतच आत्महत्या करणाऱ्या शेतकऱ्यांना शहीद म्हणून घोषित करा, ६०वर्षांवरील शेतकऱ्यांना वृद्धापकाळात सन्मानाने जगण्याकरिता ५ हजार रूपये सन्मान वेतन देण्यात यावे, मातृतीर्थ सिंदेखड राजा येथे महिला ग्रामीण विद्यापीठाची स्थापणा करावी या नवीन मागण्या या मोर्चात करण्यात आल्या. शहरातील जयस्तंभ चौकात असलेल्या स्टेजसमोर तसेच आजूबाजूला सर्व मराठा बांधव जमले होते. सकाळी ७ वाजतापासूनच जिल्हाभरातील नागरिक मोर्चात सहभागी झाले होते. अगदी शिस्तबद्धपणे सुरूवातीला युवती, महिला व त्यानंतर पुरूषांचा मोर्चामध्ये समावेश होता. सकाळी ११.३० वाजतापासून मागण्यांच्या वाचनाला सुरूवात झाली. त्यानंतर जिजाऊ वंदना घेण्यात आली. तर १२.३० वाजता राष्ट्रगीताने मोर्चाचा समारोप झाला. मंचावरील ११ मुलींनी २२ मागण्यांचे वाचन केले. त्यानंतर जिल्हाधिकाऱ्यांना निवेदन देण्यात आले. या मोर्चात लाखों समाजबांधव सहभागी झाले होते. मोर्चेकऱ्यांच्या हातात विविध घोषणांचे फलक लक्ष्यवेधी होते. अनेकांनी काळे टी शर्ट परिधान करत तसेच महिलांनी काळ्या साड्या परिधान करत निषेध नोंदविला. डोक्यावर असलेल्या काळ्या व भगव्या टोप्याही लक्ष वेधून घेत होत्या. बुलडाणा जिल्ह्याच्या इतिहासात पहिल्यांदाच मोचार्साठी विक्रमी गर्दी पहायला मिळाली. पहाटे ५ वाजेपासूनच मराठा समाजाचे गावा गावातील जत्थेच्या जत्थे बुलडाण्याकडे रवाना होत होते. शहराच्या चोहोबाजूंनी व्यवस्था करण्यात आलेल्या वाहनतळांवरही वाहने खच्चून भरली होती.लाखो महिलांचा सहभागलाखोंची गर्दी, कुठेही आवाज नाही, काळजाला हात घालणारी नि:शब्द शांतता असे वातावरण मराठा क्रांती मोर्चाच्या निमित्ताने सर्वांनी सोमवारी बुलडाण्यात अनुभवले.मोर्चात तब्बल तीन लाखांवर महिला सहभागी होत्या. रस्त्यांवर लाखोंची गर्दी, महिलांचा लक्षणीय सहभाग, कोपर्डी येथील घटनेचा राग, मराठा आरक्षणाची मागणी लावून धरण्याचा पक्का निर्धार करून एकत्रजमलेल्या मराठा समाजाच्या जनसागराची लाट उसळली.जिजाऊंच्या प्रतिमेसह जिजाऊंच्या लेकी मोर्चातबुलडाणा जिल्ह्यातील सिंदखेड राजा ही जिजाऊंची जन्मभूमी आहे. त्यामुळे सकल मराठा मोर्चात शिवाजी महाराजांच्या प्रतिमा आणि झेंड्यांसोबतच जिजामातेचे छायाचित्र असलेले झेंडे आणि प्रतिमा मोठ्या प्रमाणात दिसून आले. जिजाऊंच्या लाखो लेकींनी जिजाउंची प्रतिमा उंचावून धरली होती. त्यामुळे मोर्चात सर्वत्र शिवछत्रपती आणि जिजाऊंची छायाचित्रे झळकत होती.रस्त्यावर चौफेर रांगामराठा क्रांती मोर्चाचे आयोजन करण्यात आलेल्या जयस्तंभ चौकाला जिल्ह्यातील मुख्य रस्ते जोडले आहेत. त्यामुळे चौकाच्या चारही बाजुंनी असणाऱ्या मुख्य रस्त्यांवर सकल मराठा समाजाच्या रांगाच्या रांगा दिसून येत होत्या. विशेष म्हणजे जयस्तंभ चौक परिसरात असलेल्या सर्व इमारतींवर सुद्धा मराठ्यांची एकच गर्दी होती.श्रद्धांजली आणि राष्ट्रगीतासाठी लक्षावधी लोक स्तब्धया मोर्चात कोपर्डी बलात्कार प्रकरणातील पीडित मुलगी आणि उरी येथील दहशतवादी हल्ल्यात शहीद झालेल्या जवानांना श्रद्धांजली अर्पण करण्यात आली. तसेच राष्ट्रगीत म्हणण्यात आले. त्यावेळी लाखो लोक स्तब्ध झाले होते.