'सध्यातरी' शब्दात अडकले वडेट्टीवार; मग म्हणाले, "मुद्दाम बोललो..., जेलमध्ये जाईन, पण भाजपमध्ये जाणार नाही...!" नेमकं काय घडलं?

तुम्ही 'सध्यातरी', असे का म्हणत आहात? असा प्रश्न केला असता, वडेट्टीवार म्हणाले, "तुम्ही मला पकडणार होते, म्हणूनच मी 'सध्यातरी' हा शब्द वापरला...

मी एक नाही दहा वेळा बोललो आहे, मी जेलमध्ये जाण्यासाठी तयार आहे. वर्षभरासाठी, दोन वर्षासाठी जेलमध्ये राहू, पण भाजपमध्ये जाणार नाही, असे काँग्रेस नेते विजय वडेट्टीवार (Vijay Wadettiwar) यांनी म्हटले आहे. एवढेच नाही तर, विरोधक म्हणून लढू तर द्या, सर्वच भाजपमध्ये गेले तर मग लढणार कोण? असा सवालही त्यांनी यावेळी केली. त्यांच्या भाजपमध्ये जाण्यासंदर्भात सातत्याने होणाऱ्या चर्चेसंदर्भात विचारले असता, ते बोलत होते.  

तुम्ही भाजपमध्ये जाणार अशी चर्चा सातत्याने सुरू असते. यात खरेच काही तथ्य आहे का? असा प्रश्न विचारला असता, एबीपी माझासोबत बोलताना वडेट्टीवार म्हणाले, "जो आक्रमक असतो, त्याला बदनाम करण्यासाठी एक टोळी तयार करण्यात आली आहे. ती टोळी अशा प्रकारच्या अफवा वारंवार पसरवत असते. मी एक डायलॉग म्हणत असतो, मी सुधीर भाऊंना नेहमी म्हणत असतो, 'त्यांचे आमदारकीचे वय झाले एकतीस आणि सुधीर भाऊंना विचारत नाही देवेंद्र फडणवीस.' आता माझ्या आमदारकीला २८-२९ वर्ष झाले आहेत. मला कळत नाही, मी पहिल्या रांगेत बसणारा माणून मी तीसऱ्या रांगेत कशाला जाईन?"

'सध्यातरी' मी कुठल्याही सापळ्यात नाही. त्यामुळे... -वडेट्टीवार पुढे म्हणाले, "मी एवढी वर्षे विविधी पदांवर काम करतो आहे. विरोधी पक्ष नेता म्हणून, मंत्री म्हणून, राज्य मंत्री म्हणून, विविधी समित्यांवर काम करतोय. मी विधान परिषदेत राहिलो आहे. विधानसभेत मी सहा वेळा निवडून आलो आहे. आता आणखी काय हवे? ज्यांना, कुठल्यातरी पदाची, कुठल्या तरी गोष्टींची अपेक्षा आहे, कुठल्या तरी सापळ्यात अडकण्याची भीती आहे, त्यांचा विचार असा असू शकतो. 'सध्यातरी' मी कुठल्याही सापळ्यात नाही. त्यामुळे मी सुरक्षित आहे आणि गुरगुरतो आहे, असे मला वाटते."

'सध्यातरी' शब्दात अडकले वडेट्टीवार -यावर, तुम्ही 'सध्यातरी', असे का म्हणत आहात? असा प्रश्न केला असता, वडेट्टीवार म्हणाले, "तुम्ही मला पकडणार होते, म्हणूनच मी 'सध्यातरी' हा शब्द वापरला. कारण मी मुद्दामच तुमच्याकडे चेंडू फेकला. 'सध्या तरी' म्हणजे, याचा अर्थ एवढाच समजा की, सध्यातरी मी सुरक्षित आहे, पण नव्याने काही शडयंत्र झाले आणि कुठल्या तरी एजन्सीचा वापर झाला तर, जो काही विषय आहे, त्याला उद्देशून मला बोलायचे होते."

"मी एक नाही दहा वेळा बोललो आहे" -"मी एक नाही दहा वेळा बोललो आहे, मी जेलमध्ये जाण्यासाठी तयार आहे. काय करतील? वर्षभर ठेवतील जेलमध्ये, काही आरोप होतील, सार्वजनिक जीवनात आरोप होत असतात, राजकारणात आरोप होत असतात. त्यामुळे जाऊ आपण, ती तयारी आहे. पण माझे नाव पक्ष बदलण्याच्या यादीत येऊ नये. असे मला वाटते. वर्षभरासाठी, दोन वर्षासाठी जेलमध्ये राहू पण भाजपमध्ये जाणार नाही. विरोधक म्हणून लढू तर द्या, सर्वच भाजपमध्ये गेले तर मग लढणार कोण?" असा प्रश्नही त्यांनी यावेळी केला.