जळगाव - गुरुवारी बारावीचा निकाल लागल्याने उत्तीर्ण झालेल्या मुलांच्या घरी आनंदाचे वातावरण आहे. मात्र जळगावात घडलेल्या एका दुर्घटनेने हळहळ व्यक्त केली जात आहे. याठिकाणी जामनेर-शहापूर रस्त्यावर मॅजिक गाडी झाडाला आदळून अपघात झाला. त्यात एकाचा जागीच मृत्यू झाला तर १ जण गंभीर जखमी झाला.
जामनेरपासून काही अंतरावर शहापूरनजीक हा अपघात झाला. त्यात आनंदा भीमराव जगताप यांचा जागीच मृत्यू झाला. तर दीपक शेळके हा गंभीर झाल्याची माहिती आहे. जखमीवर जवळच्या रुग्णालयात उपचार सुरू आहेत. पोलिसांनी तात्काळ घटनास्थळी पोहचून अपघाताची माहिती घेतली. त्यानंतर मृत आनंदा जगताप यांचा मृतदेह पोस्टमोर्टम रिपोर्टसाठी पाठवण्यात आला.
आनंदावर विरजण पडलंगुरुवारी दुपारी १२ वीच्या विद्यार्थ्यांचा निकाल लागला होता. त्यात मृत आनंदा जगताप यांच्या मुलाने शाळेत पहिला क्रमांक पटकावला. मुलाचा आनंद साजरा करण्यासाठी आनंदा घरी जात होते. पण वाटेतच काळाने घात केला. मुलगा बारावी पास झाला यासाठी कुटुंबात उत्साह होता. परंतु घरातील कर्ता पुरुष अपघातात गेल्याची बातमी कळताच कुटुंबाला धक्का बसला. या बातमीने गावकरीही हळहळले.
अपघाताची चौकशीसध्या पोलिसांनी या अपघाताची नोंद केली असून अपघात नेमका कशामुळे झाला याचा पोलीस तपास करत आहेत.