शिवसेनेच्या वर्धापनाची तारीख जवळ आल्याने शिवसेनेतील ठाकरे आणि शिंदे या दोन्ही गटांमध्ये जोरदार रस्सीखेच सुरू झाली आहे. दरम्यान ठाकरे गटाचे प्रवक्ते संजय राऊत यांनी एकनाथ शिंदे यांच्या शिवसेनेवर जोरदार हल्लाबोल केला आहे. एकनाथ शिंदेंचीशिवसेना ही जत्रेतील खोटी शिवसेना आहे. शिंदेंच्या शिवसेनेचे तंबू उठण्याची वेळ आली आहे, अशी बोचरी टीका संजय राऊत यांनी केली आहे.
एकनाथ शिंदे यांच्या शिवसेनेवर टीका करताना संजय राऊत म्हणाले की, तुम्ही कधी जत्रेमध्ये गेलाय का. गावच्या जत्रेमध्ये असे तंबू असतात. या तंबूंमध्ये खोटा चंद्र, खोटी मर्सिडीज गाडी असते. तिथे लोक चंद्रावर बसून फोटो काढतात. नंतर आम्ही चंद्रावर बसलो म्हणून सांगतात. तशी ही खोटी शिवसेना आपल्या मागे लावून हे लोक फोटो काढताहेत. पण बाळासाहेब ठाकरे, उद्धव ठाकरेंची शिवसेना ही खरी शिवसेना आहे. बाकी ज्यांना खोट्या चंद्रावर बसून, खोट्या मोटारसायकलवर बसून फोटो काढायचे आहेत ते तिकडे आहेत. ती जत्रेतली खोटी शिवसेना आहे. बाकी जत्रा संपली की जत्रेतले तंबू उठतात. आता जत्रा संपण्याची वेळ आली आहे, असा टोलाही संजय राऊत यांनी लगावला.
दरम्यान, गतवर्षी १९ जून रोजी शिवसेनेचा वर्धापन दिन झाल्यानंतर दुसऱ्याच दिवशी एकनाथ शिंदे यांच्या नेतृत्वाखाली काही आमदारांनी बंड केलं होतं. त्यानंतर शिवसेनेचे अनेक नेते आणि आमदार शिंदेंसोबत गेले. त्यामुळे उद्धव ठाकरे यांच्यावर अखेर राजीनामा देण्याची नामुष्की ओढवली होती. तसेच महाविकास आघाडी सरकार कोसळले होते. त्यानंतर एकनाथ शिंदे यांनी भाजपाच्या पाठिंब्याने मुख्यमंत्रिपदाची शपथ घेतली होती.