शिवसेनेचे नेते आदित्य ठाकरे (Shivsena Aaditya Thackeray) हे बंडखोर आमदारांवर सातत्याने निशाणा साधत आहेत. बंडखोरांनी प्रामाणिक माणसाच्या पाठीत खंजीर खुपसला. ज्या माणसाने यांना राजकीय ओळख दिली, त्यांच्याच पाठीत खंजीर खुपसल्याने दुःख वाटत आहे. राजीनामा देण्याची कोणाची हिंमत नाही. हे गद्दार आहेत अन् ४० लोक गद्दार म्हणूनच महाराष्ट्रात फिरणार, अशी टीका आदित्य ठाकरेंनी केली. यानंतर आता शिंदेसमर्थक आमदार शहाजीबापू पाटलांनी (Shahajibapu Patil) आदित्य ठाकरेंवर जोरदार हल्लाबोल केला आहे.
"आम्ही गद्दार, गटारातील घाण आहोत तर आम्हाला पुन्हा पक्षात कशाला बोलवता?" असा खोचक सवाल शहाजीबापू पाटील यांनी विचारला आहे. "आदित्य ठाकरे यांनी शिवसंवाद यात्रा काढली आहे. त्या माध्यमातून ते आम्हाला खूप टाकून बोलत आहेत. सातत्याने आम्हाला गद्दार, गद्दार म्हणताहेत, गटार आहे वाहून जाऊ द्या म्हणत आहेत. मग ठीक आहे तुमच्या म्हणण्याप्रमाणे आम्ही गद्दार आहोत, गटाराची घाण आहोत तर मग आम्हाला पक्षात पुन्हा, पुन्हा बोलवताय कशाला?" असं शहाजीबापू पाटील यांनी म्हटलं आहे. माध्यमांना प्रतिक्रिया देताना त्यांनी असं म्हटलं आहे.
"शहाजीबापू नौटंकी करणारा माणूस, गद्दारी करून शहाणपणा शिकवणं योग्य नाही"
"शहाजीबापू नौटंकी करणारा माणूस, गद्दारी करून शहाणपणा शिकवणं योग्य नाही" असं म्हणत शिवसेनेने निशाणा साधला आहे. शिवसेनेचे खासदार विनायक राऊत (Shivsena Vinayak Raut) यांनी शहाजीबापू पाटील (Shahajibapu Patil) यांच्यावर हल्लाबोल केला आहे. "शहाजीबापू नौटंकी करणारा माणूस. एकदा आपटी खाल्ली, पुन्हा शिवसेनेने आधार दिला म्हणून आमदार झाले. आता नशिबातली ही शेवटची आमदारकी आहे. पांडुरंगाच्या पंढरीमध्ये राहून सुद्धा संत तुकारामही त्यांना कळले नाही. शहाजीबापूंनी गद्दारी करून शहाणपणा शिकवणं योग्य नाही" असं विनायक राऊत यांनी म्हटलं आहे. एबीपी माझाशी संवाद साधताना त्यांनी असं म्हटलं आहे.
शहाजीबापू पाटील यांनी एका वृत्तवाहिनीशी बोलताना आता आमचे नेते एकनाथ शिंदे हेच आहेत. त्यामुळे, यापुढील निवडणुकांवर आमच्याकडून उद्धव ठाकरेंचा फोटो बॅनरवर लावला जाणार नाही, एकनाथ शिंदेंचा लावला जाईल, असे स्पष्टपणे सांगितले. तसेच, आदित्य ठाकरेंच्या सुरू असलेल्या सभा आणि त्यांच्या भाषणावर बोलतानाही त्यांनी आदित्य यांच्यावर टीका केली. आदित्य ठाकरेंनी बाळासाहेबांची कॉपी करू नये, बाळासाहेबांनाच ती ठाकरी भाषा शोभत होती, उद्धव आणि आदित्य ठाकरेंना ती भाषा शोभत नाही, असेही पाटील यांनी म्हटले.