मुंबई – १०० भ्रष्टाचारी गोळा करायचे अन् त्यांना पक्षात आणायचे हे कुठलं बहुमत? याला बहुमत नाही तर व्यापार म्हणतात. ईडी ही दहशतवादी संघटना, बापाचं घर असल्यासारखं आपल्या घराचा ताबा घेतात. शिवसेना ही सत्तेसाठी जन्माला आली नाही तर शिवसेना महाराष्ट्रासाठी, लोकांसाठी संघर्ष करण्यासाठी जन्माला आलीय अशा शब्दात ठाकरे गटाचे खासदार संजय राऊत यांनी घणाघाती टीका भाजपावर केली आहे.
शिवसेना पॉडकास्टमध्ये संजय राऊतांची मुलाखत घेण्यात आली आहे. या मुलाखतीचा टीझर प्रसिद्ध करण्यात आला आहे. त्यात राऊत बेधडकपणे भाष्य करताना दिसतात. संजय राऊत म्हणतात की, मराठी माणूस ज्याला तुम्ही घाटी, कोकणी म्हणून हिणवत होता त्या माणसाला प्रतिष्ठा म्हणून शिवसेना स्थापन झाली. मित्रपक्षाने फसवले म्हणून शिवसेना थांबली का? संपली का?, हे जे कोणी बोलातयेत ते माझ्या भाषेत चुXX आहेत असंही त्यांनी म्हटलं.
तसेच शिवसेना अग्निकुंड आहे. शिवसेना तोडणं म्हणजे महाराष्ट्राच्या पाठीत खंजीर खुपसणे. उद्धव ठाकरे यांनी पक्षाचे नेतृत्व स्वीकारल्यानंतर त्यांनी बाळासाहेबांची संघटना नक्कीच दोन पाऊले पुढे नेली. भाजपानं ज्यापद्धतीने आमच्याशी वर्तवणूक केली त्यांना क्षमा नाही. महापालिका निवडणुका नाहीत. लोकसभा घेतील का नाही माहिती नाही. हे लोक जनतेला घाबरतात आणि जे जनतेला घाबरतात तो नेता नाही असा टोलाही संजय राऊतांनी भाजपाला लगावला आहे.
दरम्यान, जिथं कसाब होता तिथेच मी होतो. आर्थर रोड जेलमध्ये मतदान घेतले असते तर ९० टक्के मते शिवसेनेला मिळाली असती. शिवसेना सत्तेसाठी जन्माला आलेली नाही. लोकांच्या संघर्षासाठी जन्माला आली. शिवसेना विझली तर महाराष्ट्रातील आग संपेल असा दावाही संजय राऊतांनी केला आहे. शिवसेना सचिव आदेश बांदेकर यांनी राऊतांची ही मुलाखत घेतली आहे. त्यातून संजय राऊत बिनधास्त सर्व प्रश्नांना उत्तरे देताना पाहायला मिळत आहे. आवाज कोणाचा, शिवसेनेचा या पॉडकास्टवर १० आणि ११ ऑगस्ट संध्याकाळी ५ वाजता ही मुलाखत प्रसिद्ध होणार आहे.