महाबीजच्या संचालकपदी संजय धोत्रे, वल्लभराव देशमुख

अकोल्याचे संजय धोत्रे यांनी महाबीजच्या संचालकपदाच्या निवडणुकीत मोठय़ा फरकाने विजय संपादन केला.

अकोला : महाराष्ट्र राज्य बियाणे महामंडळ (महाबीज)च्या संचालक मंडळातील दोन पदांसाठी पार पडलेल्या निवडणुकीत, अकोल्याचे खासदार संजय धोत्रे व वल्लभराव देशमुख यांनी शुक्रवारी मोठय़ा फरकाने विजय संपादन केला. खा. धोत्रे व देशमुख यांनी सर्व अकराही फेर्‍यांमध्ये, मोठी आघाडी घेत विरोधकांना धूळ चारली. महाबीजच्या कृषी भागधारकांमधून, संचालक मंडळावर तीन वर्षांंच्या कालावधीकरिता, अकोला-विदर्भ व उर्वरित महाराष्ट्र या दोन मतदारसंघातून संचालकांची निवड करण्यासाठी निवडणूक घेण्यात आली. अकोला-विदर्भ मतदारसंघात, अकोला जिल्ह्यातून खा. संजय धोत्रे व प्रशांत गावंडे आणि अमरावती जिल्ह्यातील प्रताप भुयार निवडणूक रिंगणात होते. या मतदारसंघात खा. धोत्रे यांनी १0,४७५ मते मिळवित विजय संपादन केला. प्रशांत गावंडे यांना २,९७८ मते मिळाली. भुयार यांना अवघ्या ५0 मतांवर समाधान मानावे लागले, तर २८ मते अवैध ठरली. उर्वरित महाराष्ट्र मतदारसंघातून परभणीचे नंदकुमार भोसले, नांदेडचे राजेश्‍वर पावडे व बुलडाणा जिल्ह्यातील वल्लभराव देशमुख रिंगणात होते. या मतदारसंघामध्ये वल्लभराव देशमुख यांनी ९,१0४ मते मिळवित विजय प्राप्त केला. नंदकुमार भोसले यांना १,४१२ व राजेश्‍वर पावडे यांना ७४६ मते मिळाली, तर १३ मते अवैध ठरली. महाबीजचे एकूण ५३ हजार भागधारक आहेत. त्यापैकी अकोला-विदर्भ मतदारसंघातील १३,५३१ मतदारांनी, तर उर्वरित महाराष्ट्र मतदारसंघातील ११,२७५ मतदारांनी मतदान केले होते.